Radio Logo
RND
Escucha {param} en la aplicación
Escucha ព្រឹត្តិការណ៍អន្តរជាតិប្រចាំថ្ងៃ en la aplicación
(3.247)(171.489)
Favoritos
Despertador
Sleep timer
Favoritos
Despertador
Sleep timer
Página inicialPodcastsNoticias
ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Podcast ព្រឹត្តិការណ៍អន្តរជាតិប្រចាំថ្ងៃ
Podcast ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Guardar

Episodios disponibles

5 de 24
  • ព្រឹត្តិការណ៍អន្តរជាតិប្រចាំថ្ងៃ - លោក ចូ បៃដិន និង​​លោក ម៉ាក្រុង ទូរស័ព្ទ​និយាយ​គ្នា​​ម្តងទៀត ដើម្បី​​ពង្រឹង​ចំណងមិត្តភាព​ឡើងវិញ
    កាលពីថ្ងៃសុក្រ ម្សិលមិញនេះ លោកចូ បៃដិន និង លោក​ម៉ាក្រុង បានទូរស័ព្ទនិយាយគ្នាជាថ្មីម្តងទៀត ដើម្បី​ស្តារ និងពង្រឹងចំណងសហការឡើង វិញរវាងបារាំង និងសហរដ្ឋអាមេរិក។ ប្រទេសសម្ព័ន្ធមិត្តទាំង២នេះ បានឆ្លងកាត់បញ្ហា មើលមុខគ្នាមិនត្រង់ បន្ទាប់ពី​ អាមេរិកបានទៅបង្កើតសម្ព័ន្ធភាព AUKUS ជាមួយ​តែអូស្ត្រាលី និងអង់គ្លេស ដោយ​មិន​សួរនាំបារាំង ក៏ដូចជាអឺរ៉ុប។ តាម​រយៈសម្ព័ន្ធភាពនេះ អាមេរិកក៏បានអូសទាញអូស្ត្រាលី ឲ្យ​បោះបង់ចោល​គម្រោងទិញនាវាមុជទឹកបាទសមុទ្ររបស់បារាំងដែរ ហើយងាកទៅទិញរបស់អាមេរិកវិញ។ ស្តារទំនុកចិត្តគ្នា ឲ្យ​ល្អប្រសើរឡើងវិញ តើក្រោយ​ការនិយាយសន្ទនាគ្នា​តាមទូរស័ព្ទ កាលពីថ្ងៃសុក្រទី​២២តុលា រវាងលោកម៉ាក្រុង និង​លោកចូ បៃដិន ​បារាំងនិងអាេមរិក បានឈាន​មកជានាគ្នាឡើងវិញ ហើយ​មែនទេ? យើងមិនទាន់អាច​ថា​បែបនេះបានទេ ! តែយ៉ាងណា គឺថាលោក​ប្រធានាធិបតី​ទាំង២ កំពុងតែប្រឹងប្រឹង សម្រួលស្ថានការណ៍ ដើម្បីឲ្យប្រទេសសម្ព័ន្ធមិត្តទាំង២នេះ មានទំនុកចិត្តនឹងគ្នាវិញ។ ទំនុកចិត្ត ដែលបានជួប​បញ្ហារង្គោះរង្គើ ដោយសារតែបញ្ហា​ សំណុំរឿង​នាវាមុជទឹកបាតសមុទ្រ និងការបង្កើតសម្ព័ន្ធភាព​យុទ្ធសាស្ត្រ AUKUS។ យោងតាមលិខិតប្រកាស របស់សេតវិមាន និង របស់វិមានអេលីហ្សេបារាំង គឺ​លោក​ចូ បៃដិន និង​លោក​ម៉ាក្រុង បាន​និយាយគ្នាអំពី​សារៈសំខាន់ ដែលអឺរ៉ុប ត្រូវកសាងកម្លាំងទ័ពខ្លួនឯងមួយ ដើម្បីធ្វើបេសកម្មរក្សាសន្តិភាព។ ហើយ​បន្ថែមពីនេះ ខាងភាគីបារាំង ក៏បានស្នើទៅខាងអាមេរិកផងដែរ ឲ្យ​អាមេរិកចូលរួម​​ឲ្យ​បានសកម្ម​ នៅក្នុង​ប្រតិបត្តិការ​​ប្រយុទ្ធប្រឆាំងនឹងក្រុមជីហាតភេរវកម្ម នៅតំបន់​សាហ៊ែល​​អាហ្រ្វិក។ នៅក្នុងសារTwitter លោកចូ បៃដិន បានសរសេរថា លោក​សប្បាយចិត្តណាស់ ដែលបាន​និយាយ​គ្នាដោយ​ផ្ទាល់តាមទូរស័ព្ទ ជាមួយ​លោក ម៉ាក្រុង កាលពីថ្ងៃសុក្រម្សិលមិុញ។ ហើយ​លោក រំពឹងរងចាំ​ដោយ​អន្ទះសារ ដើម្បីជួប​លោក ម៉ាក្រុង ដោយ​ផ្ទាល់នៅទីក្រុងរ៉ូម ប្រទេសអ៊ីតាលី ក្នុងឱកាសជំនួប​កំពូល G20 នៅចុងខែ​តុលានេះ។ តាមការគ្រោងទុក មេដឹកនាំទាំង២ និងជួប​ក្នុង​ក្នុងឱកាសនេះ ជាលក្ខណៈទ្វេភាគី ដើម្បី​និយាយ​គ្នា ពី​បញ្ហាទាំងអស់នេះ ហើយ​គូសវាស​វិធានការ ដែលត្រូវធ្វើ ដើម្បីធ្វើយ៉ាងណា ពង្រឹងសម្ព័ន្ធភាព​បារាំង-អាមេរិក ឡើងវិញ។ ហើយ​បន្ទាប់មកទៀត នៅថ្ងៃទី១១ និង​ ១២វិច្ឆិកា លោកស្រី កាម៉ាឡា ហារីស អនុប្រធានាធិបតី​អាមេរិក ក៏នឹងមកទស្សនកិច្ចនៅបារាំងដែរ ដើម្បី​ចូលរួម ក្នុង​វេទិកាក្រុងប៉ារីសដើម្បីសន្តិភាព និង​សន្និសីទអន្តរជាតិស្តីពីលីប៊ី។ យោងតាមសេតវិមាន លោកស្រីកាម៉ាឡា ហារី និង​ជួប​លោក​ម៉ាក្រុង និយាយគ្នា អំពីការពង្រឹង​​ទំនាក់ទំនងអន្តរអាត្លង់ទិក ដើម្បីរក្សាស្ថិរភាព និងសន្តិសុខពិភព​លោក។ បារាំងជំរុញ បង្កើតកម្លាំងទ័ព​របស់អឺរ៉ុប គំនិត​បង្កើតកម្លាំងទ័ពផ្ទាល់ខ្លួន សម្រាប់អឺរ៉ុប គឺវាជាការចង់បាន​របស់​លោក​ម៉ាក្រុង ប្រធានាធិបតីបារាំង។ គំនិតនេះ ចាប់ផ្តើម​ផុសផុលខ្លាំង គឺនៅក្រោយ​ពេល​ អូតង់ និងអាមេរិក បានដកទ័ព​យ៉ាងតក់ក្រហល់ពី​អាហ្វហ្កានីស្ថាន ដោយ​មិន​ជូនដំណឹងមកសម្ព័ន្ធមិត្តនៅអឺរ៉ុប។ ហើយ​ក្រោយ​មកទៀត គឺសំណុំរឿងវិបត្តិ​នាវាមុជទឹកបាតសមុទ្រនេះឯង​ ដែលធ្វើឲ្យ​បារាំង និង​ប្រទេសអឺរ៉ុបខ្លះ នាំគ្នាគិតថា អឺរ៉ុប មិនអាចរំពឹង​តែទៅលើ​អាមេរិក និងអូតង់ បាន​តទៅទៀតទេ។ មានបញ្ហាខ្លះ អាមេរិកគិតប្រយោជន៍​ផ្ទាល់​ខ្លួនធំជាង​ប្រយោជន៍រួម។ ដូច្នេះ អឺរ៉ុបត្រូវតែរកវិធីការពារខ្លួន អាចមានកម្លាំងទ័ពមួយខ្លួនឯង ដើម្បីធ្វើបេសកកម្មនានា។ សម្រាប់ពេលនេះ មិនទាន់មានការអះអាងណាមួយ ពីសំណាក់ថ្នាក់ដឹកនាំអូតង់ ឬរដ្ឋាភិបាលអាមេរិក​ ថាគាំទ្រ ឬប្រឆាំងគំនិងនេះទេ ។ លោក អគ្គលេខាធិការអូតង់ ធ្លាប់បាន​លើកឡើងថា ការបង្កើតកម្លាំងទ័ពរបស់អឺរ៉ុប មកប្រជែងជាមួយ​អូតង់ គឺវា​មិនមែនជារឿងល្អប៉ុន្មានទេ។ តែយ៉ាងណាគោលជំហរនេះ ហាក់បាន​ចុះថយបន្តិចវិញហើយ បន្ទាប់ពី​ភាគីបារាំង បាន​អះអាងថា កម្លាំងទ័ពរបស់អឺរ៉ុប មិនមែនបង្កើតឡើង ដើម្បីមកប្រជែងជាមួយកម្លាំងរបស់អូតង់នោះទេ។ តែគឺមកសហការ និង​បំពេញ​ឲ្យ​គ្នាទៅវិញទៅមក។ បើតាមប្រភពពីមន្ត្រីទូត ក្នុងកិច្ចប្រជុំអូតង់ រវាងថ្ងៃព្រហស្បតិ៍ និងថ្ងៃសុក្រកន្លងមកនេះ គឺរដ្ឋមន្ត្រីការពារជាតិប្រទេសសមាជិកអូតង់ នៅមានការប្រុងប្រយ័ត្នណាស់ ក្នុងសំណុំរឿងនេះ។ ពោលគឺមិនទាន់បង្ហាញជំហរជាក់ច្បាស់ណាមួយទេ។ តែយ៉ាងណា គេអះអាងថា បរិយាកាសនិយាយគ្នា មានភាពល្អប្រសើរ ដោយភាគីអាមេរិក បានបង្ហាញជំហរស្តាប់យោបល់គេឯង​ និងមានឆន្ទៈចង់ចូលរួម​។ លោកស្រី Florence Parly រដ្ឋមន្ត្រី​ការ​ពារជាតិបារាំង បានថ្លែងអះអាងនៅក្នុងកិច្ចប្រជុំថា កម្លាំងទ័ពដ៏រឹងមាំរបស់អឺរ៉ុប ដែលមានជោគជ័យ​ គឺមិនមែនមក​ប្រជែង និង​ឬប្រកួតជាមួយ​កម្លាំងអូតង់ទេ។ ផ្ទុយទៅវិញ គឺវាជោគជ័យតាមរយៈការធ្វើការរួមគ្នា៕
    10/23/2021
    5:25
  • ព្រឹត្តិការណ៍អន្តរជាតិប្រចាំថ្ងៃ - លោកចូ បៃដិន ​អះអាង​ថា អាមេរិក​នឹងលើក​ទ័ពទៅ​ជួយ​តៃវ៉ាន់ ក្នុង​ករណី​មាន​ការ​វាយ​ប្រហារ​​ពី​ចិន
    លោក​ប្រធានាធិបតី​អាមេរិក បានថ្លែងកាលពីថ្ងៃព្រហស្បតិ៍ ទី​២១តុលាថា សហរដ្ឋអាមេរិក នឹងប្រើកម្លាំងទ័ពទៅជួយ​ការពារតៃវ៉ាន់ នៅក្នុងករណី ដែលចិនបើកការវាយប្រហារ នៅថ្ងៃណាមួយ។ ការប្រកាសរបស់​លោកចូ បៃដិន​នេះ គឺជាបញ្ជាក់គោលជំហរ យ៉ាងច្បាស់របស់អាមេរិក ខណៈដែលកន្លងមក អាមេរិកមិនដែលអះអាង ឬសន្យាឲ្យចំ ថានឹងលើកទ័ពទៅជួយ​ការពារតៃវ៉ាន់នោះទេ។ តើ​ក្រោយ​ការប្រកាសនេះ ចិននឹងដកថយទៅវិញ ឬក៏វានឹងជំរុញ​ឲ្យចិន ពុះកញ្ជ្រោល ចង់តទល់ជាមួយ​អាមេរិក ដើម្បី​ដណ្តើមកយកតៃ​វ៉ាន់ កាន់តែខ្លាំង? “សន្យាលើកទ័ពទៅជួយ​តៃវ៉ាន់” នៅក្នុង​បទសម្ភាសន៍ ផ្សាយផ្ទាល់តាមទូរទស្សន៍ CNN កាល​ពីល្ងាចថ្ងៃព្រហស្បតិ៍ ទី២១តុលា​ អ្នកកាសែតបានសួរទៅលោក​ចូ បៃដិនថា តើសហរដ្ឋអាមេរិក ពិតជាបានត្រៀមខ្លួន នឹងលើកកម្លាំងទ័ព ទៅជួយតៃវ៉ាន់ ក្នុងករណីដែល​ចិនបើកការវាយប្រហារ ដែរឬទេ? លោក ចូ បៃដិន បាន​ឆ្លើយថា ពិតមែន គឺរដ្ឋាភិបាល​លោក​បានត្រៀមខ្លួន ហើយ​សន្យាថានឹងជួយការពារ​តៃវ៉ាន់។ ការប្រកាសរបស់​លោក ចូ បៃដិននេះ គឺវាជាការបញ្ជាក់ជំហរច្បាស់ៗ ជាលើកទី១ ព្រោះថាកន្លងមក រដ្ឋាភិបាល​អាណត្តិមុនៗ មិនដែលអះអាងដូច្នេះទេ។ ពោលគឺអាមេរិកប្រកាន់ “យុទ្ធសាស្ត្រមិនចេញមុខ ឬក៏ខ្លួនមួយជាន់ទូក២” ដើម្បីរក្សាលំនឹង មិន​ឲ្យ​មានការប្រឈមមុខដាក់គ្នាដោយ​ផ្ទាល់ ជាមួយចិន នៅក្នុងសំណុំរឿងកោះតៃវ៉ាន់នេះ។ កាលពីប៉ុន្មានខែមុន នៅក្នុង​កិច្ចសម្ភាសន៍មួយទៀត នៅទូរទស្សន៍ABC លោកចូបៃដិន បាននិយាយលើកឡើង អំពីការ “សន្យាដ៏មានតម្លៃ” ដែលអាមេរិកបាន​ធ្វើ ក្នុងការការពារ​ប្រទេសសមាជិក​អូតង់ និងសម្ព័ន្ធមិត្តទាំងអស់ ដោយរាប់ទាំង កូរ៉េខាងត្បូង ជប៉ុន និងតៃវ៉ាន់ជាដើម។ តែលើកនេះ លោក ​ចូ បៃដិន និយាយច្បាស់តែម្តង ថាអាមេរិកនឹងលើកទ័ពទៅជួយ​តៃ​វ៉ាន់ ក្នុងករណី​មានការវាយ​ប្រហារពីចិន។ លោក ចូ បៃដិន ក៏បានបញ្ជាក់ផងដែរថា សូមកុំបារម្ភឲ្យសោះ ព្រោះទាំងចិន ទាំងរុស្ស៊ី គឺពួកគេដឹងច្បាស់ណាស់ ថាលើលោកនេះ គ្មានកងទ័ពប្រទេសណា មាន​កម្លាំងសមត្ថភាពខ្ពស់ និងសព្វាវុធទំនើប ដូច​កងទ័ពអាមេរិក​នោះទេ។ តែទន្ទឹមនឹងនេះ លោកចូ បៃដិន បានអះអាងថា លោកគ្មានចេតនាណាមួយ ទៅបង្កសង្រ្គាមត្រជាក់ ជាមួយចិននោះទេ។ ចិនបញ្ជូន​យន្តហោះចម្បាំង ទៅគំរាមតៃវ៉ាន់កាន់តែញឹកញាប់ លោក ចាង ជុន អគ្គរដ្ឋទូតចិន ប្រចាំអង្គការសហប្រជាជាតិ បានថ្លែងទៅកាន់អ្នកកាសែត កាលពីថ្ងៃព្រហស្បតិ៍ថា​ ប្រទេសលោក​មិនបានទៅរករឿងនរណាទេ គឺត្រឹមតែការពារខ្លួន ការពារអធិបតេយ្យភាព និង​បូរណភាព​​ដែនដីតែប៉ុណ្ណោះ។ លោកអះអាងថា អ្នកដែលកំពុងតែបង្កបញ្ហា គឺមិនមែនចិនទេ តែគឺប្រទេសមួយចំនួន ជាក់ស្តែង​​គឺ​​សហរដ្ឋ​អាមេរិក​នេះតែម្តង។ មន្ត្រីទូតចិនរូបនេះ បាន​អំពាវនាវថា អាមេរិក គួរណាតែឈប់ រុញតៃវ៉ាន់​ឲ្យផ្ទប់ជញ្ជាំង តទៅទៀតទៅ ព្រោះវាមិនហុចប្រយោជន៍ ឲ្យភាគីណាមួយទាំងអស់។ តែយ៉ាងណា ​ចិនថាខ្លួន​មិន​បង្ករឿង តែបើយើងក្រឡេកទៅមើលស្ថានការណ៍​តានតឹងនៅតៃវ៉ាន់ ប្រមាណ​១ឆ្នាំកន្លងមកនេះ គឺយើងឃើញថា ចិនជាអ្នកដាក់សំពាធខ្លាំង ទៅលើតៃវ៉ាន់។ នៅក្នុងឆ្នាំ​២០២០កន្លងទៅ ចិន​បានបញ្ជូន​យន្តហោះចម្បាំង ហោះចូលដែនអាកាសរបស់តៃវ៉ាន់ ស្ថិតនៅភាគខាងនិរតី ចំនួន​៣៨០លើក។ ក៏ប៉ុន្តែក្នុងឆ្នាំ​២០២១នេះ គិតពីដើមឆ្នាំ មកទល់ពេលនេះ ចិនបានបញ្ជូន​យន្តហោះចម្បាំង មកក្រវ៉ែល​បំភ័យតៃវ៉ាន់ ចំនួន​៦៩២លើក។ ជាក់ស្តែង នៅដើមខែនេះ ក្នុងពេល​ចិន​ប្រារព្ធពិធីបុណ្យជាតិ ក្នុងរយៈពេលតែ៤ថ្ងៃ មានយន្តហោះចម្បាំងចិន ចំនួន​១៤៩គ្រឿង បាន​ហោះមក​ក្នុងដែនអាកាសរបស់តៃវ៉ាន់។ ជាងនេះទៀត យន្តហោះចម្បាំងទាំងនោះ កាន់តែសំបូរទៅដោយ​​យន្តហោះទំនើប​ថ្មីៗ តួយ៉ាងដូ​ចជាយន្តហោះទំលាក់គ្រាប់បែក H6 ដែលមានសមត្ថភាព​​ផ្ទុកគ្រាប់​​នុយក្លេអ៊ែរ។ ដូច្នេះ សម្រាប់តៃវ៉ាន់ ក៏ដូចជាសម្រាប់អាមេរិក ការបង្ហាញសាច់ដំកាន់តែធំរបស់ចិន មកលើតៃវ៉ាន់នេះ គឺវាជា​​សញ្ញា​ប្រាប់ថា ចិនឈប់គោរព​ Statu quo ដែលចៀសវៀង​មិន​ប្រឈមមុខ​ដាក់គ្នាដោយចំហរ ទៀតហើយ។ ដូច្នេះចង់មិនចង់ តៃវ៉ាន់ និងអាមេរិក ក៏ត្រូវតែរៀបយុទ្ធសាស្ត្រថ្មីដែរ។ “កុំទុកចិត្តចិនឲ្យសោះ!” លោក Su Tzu-Yun អ្នកជំនាញយោធា នៅវិទ្យាស្ថានស្រាវជ្រាវ ការពារជាតោ និងសន្តិសុខជាតិតៃវ៉ាន់ បាន​លើកឡើងថា ការលើកទ័ព ឆ្លងច្រកសមុទ្រតៃវ៉ាន់ ពីចិនដីគោក មកកាន់កោះ​តៃវ៉ាន់ វាគឺមិនមែនជារឿងងាយ​ស្រួល​ធ្វើប៉ុន្មានទេ​ ព្រោះថាតៃវ៉ាន់ ក៏មិនមែនឈរនៅស្ងៀម មិន តដៃទៅចិននោះដែរ។ ដោយឡែក លោក Nicolas Burns ដែលនឹងត្រូវរដ្ឋាភិបាលអាមេរិក តែងតាំង​ជាអគ្គរដ្ឋទូតអាមេរិក ​ប្រចាំប្រទេសចិន ក្នុងពេលដ៏ឆាប់ខាងមុខនេះ បានលើកឡើង​ថា មិនត្រូវទុកចិត្ត​ចិនជាដាច់ខាត។ លោកម្នាក់នេះបានអំពាវនាវនាវ ចំពោះ​មុខ​គណកម្មការ​ព្រឹទ្ធសភាអាមេរិកថា ត្រូវតែលក់អាវុធ​ទំនើបៗ ឲ្យតៃវ៉ាន់បន្ថែមទៀត ដើម្បីការពារទប់ទល់​ជាមួយ​ចិន។ ទិសដៅ៣ នៃសារគំរាមរបស់ចិន បើតាមការវិភាគរបស់​លោក J.Michael Cole អ្នកជំនាញប្រចាំនៅតៃវ៉ាន់ គឺនៅពីក្រោយ​ការគំរាម សំឡុតកាន់តែខ្លាំង ទៅលើតៃវ៉ាន់ ពីសំណាក់ចិននេះ គឺវាជាយុទ្ធសាស្ត្ររបស់ចិន ដែលចង់ផ្ញើសារទៅ​ទិសដៅ​​៣ផ្សេងគ្នា។ ទីមួយ​ គឺទៅរដ្ឋាភិបាល និង​ប្រជាជនតៃវ៉ាន់ ថាមិនអាចមានថ្ងៃបានឯករាជ្យ ផ្តាច់ខ្លួនពីចិនបានជាដាច់ខាត។ ទី២គឺចិនចង់ប្រាប់​ទៅអាមេរិក និង​សម្ព័ន្ធមិត្ត ថាចិន​មិនខ្លាចញញើត ចំពោះយុទ្ធសាស្ត្រា​ប្រឆាំងចិន ដែល​អាមេរិក​និងបក្សពួក​កំពុងតែរៀបចំ នៅក្នុងតំបន់ឥណ្ឌូប៉ាស៊ីហ្វិក​ជាដាច់ខាត។ ហើយទិសដៅទី៣ គឺមតិសាធារណៈផ្ទៃក្នុងប្រទេសចិនតែម្តង ព្រោះ​ការច្បាម​យកតៃវ៉ាន់មកវិញ វាគឺ​ជា​សារ​ស្នេហាជាតិ មោទនភាពជាតិ ឲ្យ​ប្រជាជនចិន កាន់តែឃើញភាពក្លាហាន និង​អង់អាចអស្ចារ្យ របស់បក្សកុម្មុយនីស្តប៉េកាំង។ យ៉ាងណាមិញ លោក Jia Qingguo អ្នកជំនាញ​ទំនាក់ទំនង​អន្តរជាតិ នៅ​សកលវិទ្យាល័យ​ប៉េកាំង បាន​លើកឡើងថា ការសម្រេចចិត្តរបស់​ចិន ថាប្រើកម្លាំងឬមិនប្រើ គឺវាអាស្រ័យ​ទៅនឹង​អកប្បកិរិយា​របស់តៃវ៉ាន់ ថាតើ​ប្រឹង​បង្កើនសព្វាវុធ​ទំនើប​ខ្លាំងកម្រិតណា ហើយ​​មួយទៀតគឺ​វាអាស្រ័យថាតើ មតិផ្ទៃក្នុង​ចិន ដាក់​សំពាធ​មកលើរដ្ឋាភិបាល​​កម្រិតណា ក្នុងការ​បង្រួប​បង្រួមជាតិ។ យ៉ាងណាក៏ដោយ អ្វីដែលអ្នកជំនាញខ្លះបារម្ភនោះ គឺមិនមែនថា ចិនហ៊ានឬមិនហ៊ាន លើកទ័ពទៅវាយតៃវ៉ាន់នោះទេ។ តែគឺគេខ្លាចថាសង្គ្រាម អាចផ្ទុះឡើយ ដោយករណី​គ្រោះថា្នក់ ចៃដន្យ ប៉ះទង្គិចគ្នាជាយថាហេតុណាមួយ។ ចិនបញ្ជូន​យន្តហោះចម្បាំងទៅកាន់តែញឹកញាប់។​ នៅក្នុងសមុទ្រវិញ នាវាចម្បាំងអាមេរិក​ ក៏នៅក្បែរនោះ ហើយធ្វើសមយុទ្ធយោធា​ញឹកញាប់ទៀត។ ដូច្នេះ បើមានឧបត្តិហេតុណាមួយ កើតឡើងដោយ​អចេតនា នោះសង្រ្គាមអាចនឹងផ្ទុះឡើង ព្រោះថាម្នាក់ៗ កំពុងតែក្តៅរៀងៗខ្លួន៕
    10/22/2021
    7:05
  • ព្រឹត្តិការណ៍អន្តរជាតិប្រចាំថ្ងៃ - ជំនួប​កំពូល​​អឺរ៉ុប​ត្រូវនិយាយ​គ្នា​បន្ទាន់ អំពី​​ជម្លោះ​ដោយចំហ រវាង​សហភាព​អឺរ៉ុប និង​​ប្រទេស​ប៉ូឡូញ
    នៅថ្ងៃព្រហស្បតិ៍ទី​២១តុលានេះ សហភាពអឺរ៉ុបនឹងបើកជំនួប​កំពូលមួយ នៅក្រុងព្រុចស៊ែល។ មានសំណុំរឿងសំខាន់ និងបន្ទាន់មួយ​ ដែលប្រទេសអឺរ៉ុបត្រូវស្វែងរកដំណោះស្រាយ នោះគឺបញ្ហាការឡើងថ្លៃ តម្លៃថាមពល មានដូចជាភ្លើងអគ្គិសនី ហ្កាស និង​ប្រេងឥន្ធនៈ។ ប្រសិន​បើគ្មានវិធានការណាមួយទេ ប្រជាជនអឺរ៉ុបអាចនឹងចុះផ្លូវព្រោងព្រាត ដើម្បីតវ៉ាចំពោះការឡើងថ្លៃដ៏ខ្លាំងនេះ។ តែទន្ទឹមនឹងនេះ សហភាពអឺរ៉ុបមានសំណុំរឿងបន្ទាន់មួយទៀត ដែលត្រូវជជែកគ្នា នោះគឺ សំណុំរឿងវិវាទដោយចំហរ ជាមួយ​ប្រទេសប៉ូឡូញ ទាក់ទិន​នឹង​បញ្ហានីតិរដ្ឋ ព្រមទាំង​ការគោរព​គោលការណ៍​កំពូល នៃច្បាប់របស់អឺរ៉ុប។ "មាត្រាខ្លះនៃសន្ធិសញ្ញាអឺរ៉ុប មិនស្របនឹងរដ្ឋធម្មនុញ្ញប៉ូឡូញ" វិវាទនេះ កើតឡើងកាលពីថ្ងៃទី​៧តុលា បន្ទាប់ពីតុលាការធម្មនុញ្ញរបស់ប្រទេសប៉ូឡូញ បានចេញសាលក្រម ប្រកាសថា មាត្រាមួយចំនួន នៃសន្ធិសញ្ញាអឺរ៉ុប គឺមិនស្រប គ្នា ជាមួយរដ្ឋធម្មនុញ្ញរបស់​ប៉ូឡូញទេ។ តុលាការធម្មនុញ្ញប៉ូឡូញនេះ ត្រូវគេដឹកថាគ្រប់គ្រងដោយ​ក្រុមមនុស្ស​ស្តាំនិយមជ្រុល ស្និទនឹងរដ្ឋាភិបាល​ប៉ូឡូញ ដឹកនាំដោយ​លោកនាយករដ្ឋមន្ត្រី​ Mateusz Morawiecki។ សម្រាប់សហភាពអឺរ៉ុប នេះគឺជាលើកទីមួយ​ហើយ ដែល​ប្រទេសសមាជិកមួយ ប្រកាសថាសន្ធិសញ្ញាអឺរ៉ុប ដែលជាច្បាប់កំពូលរបស់សហភាពអឺរ៉ុប មិន​ស្របទៅនឹងរដ្ឋធម្មនុញ្ញរបស់​ប្រទេសសមាជិកនោះ។ សហភាពអឺរ៉ុប​បានលើកឡើងថា ប្រទេសប៉ូឡូញ កំពុងតែ​រំលោភលើ​គោលការណ៍​​គ្រិះជាមូលដ្ឋាន របស់សហភាពអឺរ៉ុប ដោយ​បានវាយ​ប្រហារ ជំទាស់មិនគោរពច្បាប់កំពូលរបស់​អឺរ៉ុប ​និងមិនគោរព​អំណាចយុត្តាធិការ របស់តុលាការ​យុត្តិធម៌អឺរ៉ុបទៀត។ សន្ធិសញ្ញាអឺរ៉ុប គឺជាគោលការណ៍​ច្បាប់កំពូល ដែលប្រទេសសមាជិក​ម្នាក់ៗ ត្រូវគោរពទាំងអស់គ្នា ពុំនោះទេ គឺវាលែងមាន​គ្រិះច្បាប់រួម សម្រាប់មហាគ្រួសារអឺរ៉ុបទៀតហើយ។ បញ្ហានេះ បានធ្វើ​ឲ្យ​មាន​ការឆ្លើយ​ឆ្លង ឌឺដងដាក់គ្នាខ្លាំងណាស់ នៅចំពោះមុខ​អង្គប្រជុំសភាអឺរ៉ុប កាលពីថ្ងៃអង្គារទី ១៩តុលា។ លោកស្រីប្រធានគណកម្មការអឺរ៉ុប Ursula von der Leyen បានលើកឡើងថា អឺរ៉ុបនឹងមិន​នៅស្ងៀមទេ ហើយ​អឺរ៉ុបនឹងចាត់វិធានការ ទៅលើ​ប្រទេស​​ប៉ូឡូញ។ លោកនាយករដ្ឋមន្ត្រីប៉ូឡូញ Mateusz Morawiecki បានឆ្លើយតបមកវិញថា អឺរ៉ុបធ្វើឬកដូចជាឪពុកម្តាយគេ ហើយ​ប្រើ​អំណាច គំរាមសំឡុតប៉ូឡូញ។ ប៉ូឡូញបំពានគោលការណ៍គ្រិះនៃនីតិរដ្ឋ កាលពីចុង​ឆ្នាំ​២០១៧ ប៉ូឡូញ បានធ្វើ​ឲ្យ​មានបញ្ហាជាមួយសហភាពអឺរ៉ុបម្តង​ហើយ។ កាលណោះ ក្រុមគណបក្ស​ស្តាំនិយមជ្រុលប៉ូឡូញ ដែលមានទំនោរស្អប់សហភាពអឺរ៉ុបទើបតែបានចូលកាន់អំណាច ហើយ​បាន​ធ្វើកំណែទម្រង់ ប្រពន្ធយុត្តិធម៌ប៉ូឡូញ។ ជាកំណែទម្រង់ ដែល​បានបង្កឲ្យ​មានការតវ៉ា ជាខ្លាំងពីសំណាក់អ្នកច្បាប់ ចៅក្រម មេធាវី និង​ពីសហភាពអឺរ៉ុបផង ព្រោះ​គេគិតថាវា​ រំលោភបំពាននឹងឯករាជ្យភាព នៃប្រព័ន្ធយុត្តិធម៌។ តួយ៉ាង ដូចជាគម្រោងបង្កើត តុលាការវិន័យ​មួយ នៅក្នុងតុលាការកំពូលប៉ូឡូញ ដើម្បី​ស៊ើបអង្កេត និង​កាត់ទោសចៅក្រម។ សម្រាប់សហភាពអឺរ៉ុប គម្រោងនេះ គឺជាយុទ្ធសាស្ត្ររបស់​រដ្ឋាភិបាលប៉ូឡូញ ក្នុងការ​ក្តោបក្តាប់ គៀបសង្កត់ទៅលើចៅក្រម មិនឲ្យ​អាចសម្រេចវិនិច្ឆ័យអ្វី ដោយ​ឯករាជ្យបាន។ ដើម្បី​ដាក់ពិន័យ​ប៉ូឡូញ សហភាពអឺរ៉ុប បាន​ចាប់ផ្តើម​នីតិវិធី នៅខែធ្នូឆ្នាំ​២០១៧ ដោយយោងលើមាត្រា ៧នៃសន្ធិសញ្ញាអឺរ៉ុប ដែលជាមាត្រាដាក់កំហិតឲ្យ​ប្រទេសសមាជិក ត្រូវតែគោរព​គោលការណ៍​គ្រិះ​នៃ​នីតិរដ្ឋ និងការបែងចែកអំណាចដោយ​ឯករាជ្យ។ នីតិវិធីនេះ អាចឈានទៅព្យួរ​​សិទ្ធិ​បោះឆ្នោតរបស់​ប៉ូឡូញ នៅក្នុង​ក្រុមប្រឹក្សាអឺរ៉ុប។ តែយ៉ាងណា រហូតមកទល់ពេលនេះ មិនទាន់មានការសម្រេចណាមួយទេ ទាក់ទិននឹងនីតិវិធីនេះ។ ខ្លាចប្រទេសផ្សេងនាំគ្នាធ្វើតាមប៉ូឡូញ ប្រទេសសមាជិក​អឺរ៉ុបមួយចំនួនធំ កំពុងបារម្ភថា បើ​បណ្តោយ​ គឺនឹងមាន​ប្រទេសខ្លះទៀត អាចនាំគ្នាធ្វើតាមប៉ូឡូញ ពោលគឺនាំគ្នាជំទាស់ លែងគោរពគោលការណ៍គ្រិះនៃច្បាប់កំពូលអឺរ៉ុប។ វាមិនខុសអី ពីនាំគ្នារុះរើ ដកសសរគ្រិះ ដែលទប់ផ្ទះអឺរ៉ុប​នោះទេ។ បើដកអស់ គឺអឺរ៉ុបនឹងរលំ។ កាលពីចុងសប្តាហ៍មុន​នេះ ប្រជាជនប៉ូឡូញរាប់ម៉ឺននាក់ ក៏បានធ្វើ​បាតុកម្មដែរ ដើម្បី​ប្រឆាំងនឹង​ទំនោររបស់រដ្ឋាភិបាលប៉ូឡូញ ដែលកំពុងតែដើរចាកឆ្ងាយ​ ពីឯកភាព​ សាមគ្គីភាពនៃមហាគ្រួសារអឺរ៉ុប។ ប្រភពពីមន្ត្រីទូតអឺរ៉ុបមួយចំនួន បានអះអាងថា សម្រាប់ដំណាក់កាលនេះ គឺអឺរ៉ុបនឹងព្យួរទុកសិន នូវការអនុម័តបញ្ចេញប្រាក់​ ចំនួន​៣៦ពាន់លានអឺរ៉ូ ក្នុងគម្រោង​ផ្តល់សន្ទុះសេដ្ឋកិច្ចប៉ូឡូញ។ ប្រភពពីវិមានប្រធានាធិបតី​បារាំង អះអាងថា ការព្យួរនេះ វាមិនមែនជាការគំរាមសំឡុត ទៅលើ​ប៉ូឡូញទេ។ តែការគោរព​នីតិរដ្ឋ និងឯករាជ្យភាពនៃវិស័យយុត្តិធម៌ វាគឺជាគោលការណ៍គ្រិះកំពូល របស់​អឺរ៉ុប ដែលប្រទេសសមាជិកនីមួយៗ ត្រូវតែគោរព។ ក្រុមសមាជិកសភាអឺរ៉ុប ក៏បានអំពាវនាវដែរ ឲ្យ​អឺរ៉ុបត្រូវតែ​ បើកនីតិវិធីព្យួរកញ្ចប់ថវិកាអឺរ៉ុបផ្សេងៗទៀត កុំប្រគល់ទៅឲ្យ​ប្រទេសសមាជិកណា ដែល​បានធ្វើបំពាននឹងគោលការណ៍គ្រិះអឺរ៉ុប។ ក្រៅពីប៉ូឡូញ ប្រទេសហុងគ្រី ក៏អាចជាប់ក្នុងការពិន័យនេះដែរ។ លោកស្រីប្រធានគណកម្មការអឺរ៉ុប បានអះអាងថា អឺរ៉ុបនឹងផ្ញើលិខិតជូនដំណឹងទៅប្រទេសទាំងនោះ ហើយសម្រាប់ប៉ូឡូញ គឺ​អឺរ៉ុបអាចនឹង ប្តឹងទៅ​តុលាការយុត្តិធម៌អឺរ៉ុប ពីបទមិនគោរព​សន្ធិសញ្ញាអឺរ៉ុប។ ដាក់ពិន័យ ឬនិយាយគ្នាតាមសម្រួល? ប៊ែលហ្ស៊ិក និងហូឡង់ បានទាមទារឲ្យដាក់សំណុំរឿងប៉ូឡូញនេះ នៅក្នុង​ជំនួប​កំពូលនៅថ្ងៃនេះ។ តែយ៉ាងណា វាជាការយករឿងមកដាក់លើតុ ពិភាក្សាគ្នាសិន ដោយ​មិនមាន​ការសម្រេច​ចុងក្រោយ​ណាមួយទេ សម្រាប់ពេលនេះ។ ពោលគឺ មិនទាន់មានការមូលមតិគ្នាណាមួយទេ ទាក់ទិននឹងវិធានការ​ ដែលគេនឹងអនុវត្តទៅលើប៉ូឡូញ។ លោកស្រី​អង់ហ្គេឡា​ មែរគិល ប្រមុខរដ្ឋាភិបាលអាល្លឺម៉ង់ បាន​លើកឡើងថា លោកស្រី ចង់ឲ្យអឺរ៉ុបប្រកាន់ជំហរ និយាយគ្នាតាមសម្រួលជាមួយ​ប៉ូឡូញ ចៀសវាងការពាក់មុខយក្សដាក់គ្នា។ ដោយឡែក លោក Iratxe Garcia Perez ប្រធានក្រុមសមាជិកសភាអឺរ៉ុបឆ្វេងនិយមវិញ​ បាន​លើកឡើងថា នៅពេលណាសមាជិកម្នាក់ គំរាមថាលែងចង់គោរព​វិធានច្បាប់រួម គឺប្រទេសនោះ បានដើរទៅជិតមាត់ទ្វារចេញដោយខ្លួនឯង ដោយ​គ្មាននរណាដេញទេ។ សម្តីនេះ ហាក់មានន័យសំដៅអំពីលទ្ធភាព ដែលប៉ូឡូញ អាចនឹងចាកចេញពី​សហភាពអឺរ៉ុប។ តែយ៉ាងណា នៅក្នុង​សម្តីរបស់​លោកនាយករដ្ឋមន្ត្រីប៉ូឡូញ នៅសភាអឺរ៉ុបកាលពីថ្ងៃអង្គារ គឺលោកអះអាងថា ប៉ូឡូញនឹងនៅតែជាសមាជិករបស់សហភាពអឺរ៉ុបជានិច្ច។ អឺរ៉ុបអះអាងថា នឹងផ្ញើលិខិតជូនដំណឹង ទៅប៉ូឡូញ ស្តីអំពីលទ្ធភាព​នៃការបើកនីតិវិធីព្យួរកញ្ចប់ថវិកាអឺរ៉ុប។ ក៏ប៉ុន្តែ នីតិវិធីនេះ ត្រូវបាន​ប៉ូឡូញនិងហុងគ្រីប្តឹងជំទាស់ និងសុំលុបចោល រួចទៅហើយនៅតុលាការយុត្តិធម៌អឺរ៉ុប។ តាមធម្មតាតុលាការនេះ នឹងចេញសាលក្រមកាត់ក្តី នៅចុងឆ្នាំនេះ។ មតិខ្លះ បានលើកឡើងថា សហភាពអឺរ៉ុបត្រូវរងចាំយោបល់សម្រេច ពីតុលាការយុត្តិធម៌អឺរ៉ុបសិន មុននឹងចាប់ផ្តើមអនុវត្តនីតិវិធីនេះ ទៅលើ​ប៉ូឡូញ៕
    10/21/2021
    7:38
  • ព្រឹត្តិការណ៍អន្តរជាតិប្រចាំថ្ងៃ - តើ​តូតាល់​ពិត​ជា​បាន​ដឹង​តាំង​ពី​៥០​ឆ្នាំមុន​ ថា​សកម្មភាព​ក្រុមហ៊ុន​ប៉ះពាល់​ដល់​​អាកាសធាតុ មែនឬ ?
    ជា​របាយការណ៍​ដ៏​សំខាន់​ និង​មាន​តម្លៃ​ខ្លាំង​ សម្រាប់​បញ្ជាក់​​អំពី​ទំនួល​ខុស​ត្រូវ​របស់​ក្រុមហ៊ុន​ថាមពល​ និង​សម្រាប់​ជំរុញ​ឱ្យ​ក្រុមហ៊ុន​បញ្ចេញ​សកម្មភាព​ជាក់ស្តែង។ ១០​ថ្ងៃ​មុន​​បើក​​សន្និសីទ​អង្គការ​សហប្រជាជាតិ​​ស្តី​ពីអាកាសធាតុ​  ​ក្រុម​​អ្នក​ជំនាញវិទ្យាសាស្ត្រ​​នៅ​បារាំងបានចេញ​ផ្សាយ​ការសិក្សាមួយនៅថ្ងៃពុធ​ទី ២០​តុលា​២០២១​នេះ ​​ទម្លាយ​ឱ្យ​ដឹង​​ថា ក្រុមហ៊ុនប្រេង​តូតាល់ ដឹងតាំង​ពីឆ្នាំ១៩៧១ អំពី​ ​ផលប៉ះពាល់នៃ​សកម្មភាព​របស់​ខ្លួន​លើ​​​អាកាសធាតុ ក៏ប៉ុន្តែ តូតាល់ ធ្វើ​មិនដឹងមិនឮ ហើយក្រោយមកទៀត ​ថែម​ទាំង​បានព្យាយាម​រារាំង​កិច្ចខិតខំប្រឹងប្រែង​កាត់បន្ថយ​ការ​ប្រើ​ថាមពល​ផូស៊ីល។ ​ គេ​ធ្លាប់​បាន​ដឹង និង​បាន​ឮ​ច្រើន​មក​​ហើយថា​ក្រុមហ៊ុន​ប្រេង ExxonMobile BP Shell ​របស់​អាមេរិក អង់គ្លេស និង​អង់គ្លេស​កាត់​ហូឡង់ មិន​ទទួល​ស្គាល់តាំង​ពីយូរលង់​មក​ហើយ​អំពីការ​ប្រែប្រួលអាកាសធាតុ​បង្កឡើង​ដោយ​សកម្មភាព​របស់​ក្រុមហ៊ុន​ប្រេង​របស់​ពួកគេ​។ ក្រុមហ៊ុន​យក្ស​ទាំង​បី​នេះ ថែម​ទាំង​ចំណាយ​លុយ​ជា​ច្រើន​ជួយ​ក្រុម​អ្នក​ប្រឆាំង​អាកាសធាតុ​ ដើម្បី​ផ្សព្វផ្សាយ​ព័ត៌មាន​មិន​ពិត​ ឬ​ព័ត៌មាន​ក្លែងក្លាយ និង​​ដឹកនាំ​នយោបាយ​ប្រឆាំង​នឹង​ការ​កាត់​បន្ថយ​ការ​បញ្ចេញ​ឧស្ម័ន​ផ្ទះ​កញ្ចក់​ទៀត។ ​នៅ​ថ្ងៃ​នេះ ដល់​វេន​ក្រុមហ៊ុន​បារាំង​ តូតាល់ Total និង​អ៊ែហ្វ Elf​ម្តង ដែល​ត្រូវ​អ្នកវិទ្យាសាស្ត្រ​ចង្អុលមុខ។ តូតាល់​ចាប់​និយាយ​ពី​ហានិភ័យ​អាកាសធាតុ​ នៅ​ឆ្នាំ​១៩៧១ ​ការ​សិក្សា​ចេញ​ផ្សាយ​នៅ​ថ្ងៃពុធ​ទី ២០​តុលា ២០២១​ ក្នុង​ទស្សនាវដ្តី  Global Environmental Change បាន​បង្ហាញ​ថា តូតាល់​បាន​ដឹង តាំងពីយូរ មុន​សាធារណជន​ទូទៅ គឺ​តាំងពី​ឆ្នាំ​១៩៧១ ថា​សកម្មភាព​របស់​ក្រុមហ៊ុន​គំរាមកំហែង​ដល់​អាកាសធាតុ​ ដោយ​នាំ​ឱ្យ​មាន​ការ​ឡើង​កម្តៅ​អាកាសធាតុ និង​គ្រោះ​មហន្តរាយធម្មជាតិ​ធ្ងន់ធ្ងរ។ បន្ទាប់​ពី​ធ្វើ​មិន​ដឹង​មិន​ឮ​អស់​ជា​ច្រើន​ឆ្នាំ និង​នៅ​ពេល​បាន​យល់​ជាក់​អំពី​ផលប៉ះពាល់​នៃការ​ប្រែប្រួល​អាកាសធាតុ​ហើយ ក៏​ក្រុមហ៊ុន​តូតាល់ បន្ត​សាបព្រោះ​ភាព​សង្ស័យ​ ស្តី​ពី​ការ​ប្រែប្រួល​អាកាសធាតុ និង​បាន​ព្យាយាម​រារាំង​សកម្មភាព​ប្រឹង​ប្រែង​កាត់​បន្ថយ​ឧស្ម័ន​ផ្ទះ​កញ្ចក់​ទៀត។ តូតាល់​បាន​ព្យាយាម​រារាំង​នយោបាយ​កាត់​​បន្ថយ​ឧស្ម័ន​កាបូនិក​បាន​ហើយ​ថែមទាំង​អាច​បង្ហាញ​ខ្លួន​ជា​ក្រុមហ៊ុន​ការពារ​បរិស្ថាន​ទៀត។ ប៉ុន្តែនៅ​ចំពោះ​មុខ​សំណួរ​ថា​តើ​​ក្រុមហ៊ុនមាន​​ទំនួល​ខុស​ត្រូវ​​​យ៉ាងណា ឬ​ ​ដូច​​ក្រុម​ហ៊ុន​ប្រេង​អាមេរិក​Exxon ដែល​បានដឹកនាំ​ធ្វើ​​យុទ្ធនាការ​អន្តរជាតិ​​​ប្រឆាំង​នឹង​អាកាសធាតុនិង​រារាំងការ​ត្រួតពិនិត្យ​ថាមពលផូស៊ីល ដែរ​ឬ​អត់នោះ  គេ​ត្រូវ​សិក្សា និង​វិភាគ​​បន្ថែម​ ឱ្យ​ស៊ីជម្រៅ​ទៀត។ នេះ​បើ​តាម​ម្ចាស់​របាយការណ៍ ដែល​បញ្ជាក់ថា​អ្វី​ដែល​ថ្មី សម្រាប់​ពេល​នេះ គឺ​មិនមែន​​មាន​តែ​ក្រុមហ៊ុន​ប្រេង​អាមេរិក Exxon មួយ​ទេ​ ដែល​ដឹង​ហើយ​មិន​ធ្វើ​អ្វី​នោះ។ ក្រុមហ៊ុន​តូតាល់ ក៏ទំនង​ជា​បាន​ប្រកាន់​ឥរិយាបថបែប​នេះ យ៉ាងហោច​ពី​ឆ្នាំ​១៩៨៧ដល់​ឆ្នាំ ១៩៩៤។ ​Total និង​Elf ដែល​បញ្ចូល​គ្នា​ជា​ក្រុមហ៊ុន Total Energie ​តែ​មួយ​នៅ​ឆ្នាំ​១៩៩៩ ទើប​ចាប់​ផ្តើម​បញ្ឈប់​ការ​ចោទ​ជា​សាធារណៈលទ្ធផល​សិក្សា​របស់​អ្នក​វិទ្យាសាស្ត្រ​ជំនាញ​អាកាសធាតុ នៅ​ពេល​អង្គការ​សហប្រជាជាតិ​អនុម័ត​ពិធីសារក្យូតូ​ប៉ុណ្ណោះ។ ហើយ​គេ​ត្រូវ​រង់​ចាំ​ដល់​ឆ្នាំ​២០០៦​ទើប​ឃើញ​ក្រុមហ៊ុន​តូតាល់​មាន​យុទ្ធសាស្ត្រ​អាកាសធាតុ​ថ្មី ដោយ​ទទួល​បើក​សន្និសីទ​ស្តី​អំពី​អាកាសធាតុ​ និង​ទទួល​ស្គាល់​ជា​ផ្លូវការ​ ការ​ប្រែប្រួលអាកាសធាតុ និង​របាយការណ៍​របស់​​អ្នក​ជំនាញ​អាកាសធាតុ​អង្គការ​សហប្រជាជាតិ Giec។ "Total Information" ពុំ​ដែល​មានទេ​​ការ​ស្រាវជ្រាវរយៈ​ពេល​វែង​ខ្លាំង ​ស្តី​អំពី​ទំនួល​ខុស​ត្រូវ​របស់​ក្រុមហ៊ុន​ប្រេង​ធំៗចំពោះ​ការ​ប្រែប្រួល​អាកាសធាតុ​។ ហើយ​ក៏​គ្មាន​អ្នក​ស្រាវជ្រាវ​ណា​ម្នាក់បាន​​នឹក​គិត​ទៅ​សិក្សា​ផ្តោត​លើ​ក្រុមហ៊ុន​តូតាល់​ដែល​មាន​កំណើត​តាំងពី​ឆ្នាំ​១៩២៤​ និង​ដ៏​សំខាន់​មួយ​នៅលើ​ពិភពលោក ពីមុន​មក​ទេ។ ប៉ុន្តែ​ការសិក្សា​អាចស​ម្រេច​ទៅ​បាន​ ដោយ​ចៃដន្យ បន្ទាប់​ពី អ្នក​វិទ្យាសាស្ត្រ​បារាំង​ពីរ​រូប​និង​អាមេរិក​ម្នាក់​ បាន​ឃើញ​ឯកសារ​ផ្ទៃក្នុង​​របស់​ក្រុមហ៊ុន ចេញ​ផ្សាយ​ក្នុង​ទស្សនាវដ្តី​ក្រុមហ៊ុន​ Total Information ឆ្នាំ​១៩៧១ និយាយ​អំពី​ការ​ឡើង​កម្តៅ​អាកាសធាតុ​នៃ​ភពផែនដី​ ទើប​ចាប់​ផ្តើម​ដឹកនាំ​ធ្វើ​សម្ភាសន៍ជាង​៣០ ​សាកសួរ​អតីតអ្នក​ទទួល​ខុស​ត្រូវ​របស់​ក្រុមហ៊ុន​ទាំង​ពីរ មន្ត្រីជាន់ខ្ពស់ និង​អ្នក​ជំនាញ​អាកាសធាតុ ឬ​សេដ្ឋកិច្ច។ នៅក្នុង​អត្ថបទ​កាលពី​ឆ្នាំ​១៩៧១​នោះ អ្នកនិពន្ធលោក François Durand-Dastès ​ដែល​ជា​ភូគព្ភវិទូ​ដ៏​ល្បី​ល្បាញ​ក្នុង​សម័យ​នោះ បាន​ពន្យល់​ថា “តាំង​ពី​សតវត្សរ៍​ទី ១៩មក មនុស្ស​បានបង្កើនរៀង​រាល់​ថ្ងៃនូវ​បរិមាណ​​​ដុត​កម្តៅ​ថាមពល​ផូស៊ីល ​ ធ្យូងថ្ម ប្រេង ឧស្ម័នហ្គាស ដែល​​នឹង​បញ្ចេញ​ឧស្ម័ន​កាបូនិក​ច្រើន​ទៅ​ក្នុង​បរិយាកាស។ ក្នុង​ល្បឿន​នេះ​សីតុណ្ហភាព​នៃ​បរិយាកាសនឹង​ឡើង​ក្តៅ​គួរ​ឱ្យ​ព្រួយ​បារម្ភ​ ហើយ​នឹង​អាច​ទឹកកក​នៅ​តំបន់​ត្រូវ​រលាយ​យ៉ាង​ហោច​អស់​មួយភាគ កម្ពស់​ទឹក​សមុទ្ទ​នឹង​ឡើង ជាមួយ​មហន្តរាយ​ធម្មជាតិជាប់​​រដឹកត​។” ទស្សនាវដ្តី​នោះ​ត្រូវ​បាន​បោះផ្សាយ​ចំនួន​៦ពាន់​ក្បាល និង​មាន​ចុះ​ហត្ថលេខា​ដោយ​អគ្គនាយក​ក្រុមហ៊ុន​តូតាល់​ក្នុង​បទ​វិចារណកថា​ទៀត។ នេះ​បើ​តាម​ការ​បញ្ជាក់​របស់​អ្នក​ស្រាវជ្រាវ។ ​តូតាល់​វិនិយោគ​ថាមពល​កើត​ឡើង​វិញ នៅ​ក្នុង​ចម្លើយ​ផ្តល់​មក​ភ្នាក់ងារ​សារព័ត៌មាន​បារាំងAFP មុន​ការ​ចេញ​ផ្សាយ​លទ្ធផល​សិក្សា​របស់​អ្នក​វិទ្យាសាស្ត្រ​នេះ​បន្តិច តូតាល់​បាន​អះអាង​ថា ក្រុមហ៊ុន​បាន​ដឹង​អំពី​គ្រោះ​ហានិភ័យ​អាកាសធាតុបណ្តាល​មក​ពីស្នាដៃ​មនុស្ស​​  តាំង​ពី​ឆ្នាំ​ទសវត្សរ៍​៧០​មែន ប៉ុន្តែ​ចំណេះ​ដឹង​នោះ​គ្មាន​អ្វី​ខុស​គ្នា​ពី​ចំណេះ​ដឹង​របស់​អ្នក​វិទ្យាសាស្ត្រ​ជំនាញ​អាកាសធាតុ​សម័យ​នោះ​ទេ​ (ទសវត្សរ៍៧០)​ ហើយ​តាំង​ពី​ឆ្នាំ ២០១៥​មក ក្រុមហ៊ុន​មាន​កម្មវត្ថុ ​ដើរ​តួ​ចម្បង​ក្នុងការ​ធ្វើ​អន្តរកាល​ថាមពល។ តូតាល់​បាន​ក្លាយ​ជា​ក្រុមហ៊ុន​ដ៏​ធំមួយ​​ក្នុង​ចំណោម៥​​ក្រុមហ៊ុន​ថាមពល​ធំៗ​នៅលើ​ពិភពលោក ដែល​ផលិត​អគ្គីសនី​កើតឡើង​វិញ​ និង​មាន​​កម្មវត្ថុ​ហ្សេរ៉ូកាបោន នៅ​ឆ្នាំ​២០២៥។ ជាការពិត តូតាល់​បាន​ធ្វើ​វិនិយោគ​ច្រើន​ក្នុង​វិស័យ​ថាមពល​កើត​ឡើង​វិញ ប៉ុន្តែ​បើ​តាម​ការ​គណនា​របស់​អង្គការ​ក្រៅ​រដ្ឋាភិបាល ថាមពលកើតឡើង​វិញ​ តំណាង​ឱ្យ​០,២%​នៃ​ផលិតកម្ម​ថាមពល​របស់​ក្រុមហ៊ុន​តែ​ប៉ុណ្ណោះ​នៅពេល​នេះ និង​កើន​ឡើង​ ១,១ទៅ​១,៦%​នៅ​ឆ្នាំ​២០២៥។ ផ្ទុយ​ទៅវិញ តូតាល់​ គ្រោង​នឹង​បង្កើន​ផលិតកម្ម​ឧស្ម័នហ្គាស ៣៥% នៅ​ឆ្នាំ ២០៣០ បើ​ប្រៀប​ទៅ​នឹង​ផលិតកម្ម​ឆ្នាំ​២០១៩។ ហើយ​ទោះបី​ជា​តូតាល់​គ្រោង​កាត់​បន្ថយ​ផលិតផល​ប្រេង​ចំនួន​៣០%​មែន តែ​តូតាល់​ក៏​មាន​គម្រោង​បូមប្រេងថ្មីៗ​ជា​ច្រើន​ផ្សេង​ទៀត៕
    10/20/2021
    6:39
  • ព្រឹត្តិការណ៍អន្តរជាតិប្រចាំថ្ងៃ - អាមេរិកសោកស្តាយការបាត់បង់លោកខូលីន ផូវែល តែបានដាស់អារម្មណ៍ប្រជាជនអ៊ីរ៉ាក់ឲ្យនឹកឃើញរឿងជូរចត់
    នៅ​អាមេរិក អតីត​នាយសេនាធិការ និង​ជា​អតីត​រដ្ឋមន្រ្តី​ការបរទេស​លោក​ខូលីន ផូវែល (Colin Powell) បាន​ទទួល​មរណៈភាព​នា​ថ្ងៃ​អង្គារ ទី១៩ តុលា​ក្នុង​ជន្មាយុ ៨៤ឆ្នាំ​ដោយ​ជំងឺ​កូវីដ១៩។ ថ្នាក់ដឹកនាំ​អាមេរិក​គ្រប់ជាន់​ថ្នាក់​បាន​ចូលរួម​គោរពវិញ្ញាណក្ខន្ទ និង​សម្តែង​ការ​សោកស្តាយ​ចំពោះ​ការ​បាត់បង់​លោក​ខូលីន ផូវែល។ តែ​សម្រាប់​ប្រជាជន​អ៊ីរ៉ាក់ មរណៈភាព​របស់​អតីត​រដ្ឋមន្រ្តី​ការបរទេស​អាមេរិក​រូប​នេះ​បាន​ដាស់​អារម្មណ៍​ឲ្យ​ពួក​គេ​នឹក​ឃើញ​នូវ​រឿង​ដ៏​ល្វីងជូរចត់។ លោក​ខូលីន ផូវែល​បាន​កើត​ក្នុង​ថ្ងៃទី៥ មេសា ឆ្នាំ ១៩៣៧ នៅ​សង្កាត់​ហាឡឹម និង​បាន​ធំ​ដឹង​ក្តី​នៅ​ញូយ៉ក​ដែល​លោក​បាន​សិក្សា​មុខវិជ្ជា​ភូគព្ភសាស្រ្ត។ បន្ទាប់​មក លោក​ផូវែល​បាន​ចាប់​ផ្តើម​អាជីព​ជា​កងទ័ព​ក្នុង​ឆ្នាំ ១៩៥៨ ដោយ​បាន​ចេញ​ទៅ​បំពេញ​បេសកកម្ម​ដំបូង​នៅ​ក្នុង​ប្រទេស​អាល្លឺម៉ង់​ខាង​លិច និង​ក្រោយ​មក​នៅ​ក្នុង​សង្រ្គាម​វៀតណាម​ចំនួន ២ដង។ តែ​សម្រាប់​បេសកកម្ម​លើកទី២ នៅ​ក្នុង​សង្រ្គាម​វៀតណាម លោក​ខូលីន ផូវែល​មាន​តួនាទី​ជា​ទីប្រឹក្សាកងទ័ព​របស់​ប្រធានាធិបតី​ជំនាន់​នោះ គឺ​លោក​ចន កេននេឌី។ នៅ​ពេល​ត្រឡប់​ចូល​អាមេរិក​វិញ លោក​ខូលីន ផូវែល​បាន​ឡើង​បុណ្យសក្តិ​កាន់​តែ​ខ្ពស់​ដោយ​បាន​ក្លាយ​ជា​ទីប្រឹក្សាសន្តិសុខជាតិ​នៅ​ក្នុង​ជំនាន់​ប្រធានាធិបតី​អាមេរិក​លោក​រ៉ូណាល់ រីហ្គេន។ ក្រោយ​មក​ទៀត លោក​ផូវែល​បាន​ក្លាយ​ជា​នាយសេនាធិការ​ក្នុង​ជំនាន់​ប្រធានាធិបតី​អាមេរិក​លោក George H.W.Bush ឱ និង​ជំនាន់​ប្រធានាធិបតី​អាមេរិក​លោក​ប៊ីល គ្លីនតុន​ពី​ឆ្នាំ ១៩៨៩​ដល់​ឆ្នាំ ១៩៩៣។ តែ​បុណ្យសក្តិ​របស់​លោក​ខូលីន ផូវែល​មិនមែន​ចប់​ត្រឹម​ជា​នាយសេនាធិការ​ទេ ព្រោះ​នៅ​ពេល​ដែល​លោក George W.Bush កូន​ជាប់​ឆ្នោត​ជា​ប្រធានាធិបតី​អាណត្តិ​ទី១ ពី​ឆ្នាំ ២០០១ ដល់​ឆ្នាំ ២០០៩ លោក Bush បាន​តែងតាំង​លោក​ខូលីន ផូវែល​ឲ្យ​ធ្វើ​ជា​រដ្ឋមន្រ្តី​ការបរទេស។ នេះ​ជា​លើកទី១ នៅ​ក្នុង​ប្រវត្តិអាមេរិក​ដែល​មាន​ជនជាតិ​អាមេរិក​ស្បែកខ្មៅ​ម្នាក់​កាន់​តំណែង​រដ្ឋមន្រ្តី​ការបរទេស។ លោក​ខូលីន ផូវែល​អាប់ឱន​កេរ្តិ៍ឈ្មោះ​ដោយសារ​តែ​សង្រ្គាម​អ៊ីរ៉ាក់​ឆ្នាំ ២០០៣ ក្នុង​ឆ្នាំ ២០០៣ អាមេរិក​ក្នុង​ជំនាន់​ប្រធានាធិបតី​លោក Bush កូន​បាន​បញ្ឆេះ​សង្រ្គាម​នៅ​ក្នុង​ប្រទេស​អ៊ីរ៉ាក់។ ដើម្បី​បង្ហាញ​ប្រាប់​ពិភពលោក​ពី​ជម្រើស​របស់​អាមេរិក​ក្នុង​ការ​វាយប្រហារ​អ៊ីរ៉ាក់​ក្នុង​ឆ្នាំ ២០០៣ លោក​ខូលីន ផូវែល​ក្នុង​នាម​ជា​រដ្ឋមន្រ្តី​ការបរទេស​បាន​ធ្វើ​ដំណើរ​ទៅ​កាន់​ទីស្នាក់ការ​ក្រុមប្រឹក្សា​សន្តិសុខ​អង្គការ​សហប្រជាជាតិ​ក្នុង​ថ្ងៃទី៥ កុម្ភៈ ឆ្នាំ ២០០៣ ដើម្បី​បង្ហាញ​ភស្តុតាង​ដែល​បញ្ជាក់​ថា អ៊ីរ៉ាក់​ក្នុង​ជំនាន់​ប្រធានាធិបតី​សាដាម ហ៊ូសេន​មាន​អាវុធប្រល័យ​លោក។ នៅ​ក្នុង​សង្កថា​ដ៏​យូរ និង​វែង​អន្លាយ លោក​ផូវែល​បាន​លើក​យក​ភស្តុតាង​ជា​ឯកសារ និង​រូបភាព​ម្តង​មួយៗ ដើម្បី​ប្រាប់​សមាជិក​ក្រុមប្រឹក្សា​សន្តិសុខ និង​ពិភពលោក​ថា អ៊ីរ៉ាក់​របស់​សាដាម ហ៊ូសេន​មាន​អាវុធ​ប្រល័យ​លោក។ ក៏​ប៉ុន្តែ​នៅ​ជាង ២ឆ្នាំ​ក្រោយ​មក ពោល​ក្នុង​ថ្ងៃទី៨ កញ្ញា ឆ្នាំ ២០០៥ រដ្ឋមន្រ្តី​ការបរទេស​លោក​ខូលីន ផូវែល​រូប​នេះ​ដដែល​បាន​ចេញ​មុខ​ថ្លែង​ថា ឯកសារ និង​រូបភាព​ដែល​លោក​បាន​បង្ហាញ​ពី​វត្តមាន​អាវុធប្រល័យលោក​របស់​អ៊ីរាក់​បាន​ធ្វើ​ឲ្យ​ប្រលាក់ និង​អាប់ឱន​កេរ្តិ៍ឈ្មោះ​របស់​លោក។ អ្វី​ដែល​លោក​ផូវែល​ចង់​មាន​ន័យ គឺ​អ៊ីរ៉ាក់​គ្មាន​អាវុធប្រល័យលោក​ទេ។ តាម​លោក​ផូវែល សូម្បី​តែ​អ្នក​ទទួល​ខុស​ត្រូវ​ខ្លះ​នៃ​ក្រសួង​ស៊ើបការណ៍សម្ងាត់​អាមេរិក​ក៏​ដឹង​ដែរ​ថា ភស្តុតាង​ដែល​បញ្ជាក់​ពី​វត្តមាន​អាវុធប្រល័យលោក​របស់​អ៊ីរ៉ាក់​មិន​ពិត និង​ជា​ភស្តុតាង​ប្រឌិត​ឡើង​សុទ្ធសាធ។ គេ​អាច​និយាយ​បាន​ថា នៅ​ក្នុង​មួយ​ជីវិត​របស់​លោក​ខូលីន ផូវែល ប្រហែល​មាន​តែ​រឿងរ៉ាវ​ការ​បង្ហាញ​ភស្តុតាង​ពី​វត្តមាន​អាវុធប្រល័យលោក​របស់​អ៊ីរ៉ាក់​កាល​ពី​ថ្ងៃទី៥ កុម្ភៈ ឆ្នាំ ២០០៣​ទេ​ដែល​បាន​ធ្វើ​ឲ្យ​លោក​ក្តុកក្តួល និង​សោកស្តាយ​ខ្លាំង​ជាង​គេ។ ក្តុកក្តួល និង​សោកស្តាយ​ខ្លាំង ព្រោះ​សង្រ្គាម​អាមេរិក​នៅ​អ៊ីរ៉ាក់​ក្នុង​ឆ្នាំ ២០០៣ ដែល​ធ្វើ​ឡើង​ដផយ​សំអាង​លើ​ភស្តុតាង​មិន​ពិត​បាន​ផ្តល់​ផលវិបាក និង​ទុក្ខវេទនា​ដល់​ប្រទេស និង​ប្រជាជន​អ៊ីរ៉ាក់​មក​ដល់​សព្វថ្ងៃ៕ លោក George W. Bush៖​លោក​ខូលីន ផូវែល​ជា​អ្នក​បម្រើ​ប្រទេស​ជាតិ​ដ៏​អស្ចារ្យ​ម្នាក់ នៅ​អាមេរិក គឺ​មាន​តែ​ការ​សោកស្តាយ និង​ជា​ពេល​វេលា​ចូលរួម​គោរពវិញ្ញាក្ខន្ទ​ចំពោះ​មរណៈភាព​លោក​ខូលីន ផូវែល។ មុន​គេ​គឺ​អតីត​ប្រធានាធិបតី​លោក George W. Bush ដែល​បាន​សាទរ​ពី​ស្នាដៃ​របស់​លោក​ខូលីន ផូវែល​ដោយ​បញ្ជាក់​បន្ថែម​ថា លោក​ផូវែល​ជា​ឥស្សរជន​ដែល​ទទួល​បាន​ការ​គោរព​ខ្លាំង​ណាស់​នៅ​អាមេរិក និង​នៅ​បរទេស។ « ពិភពលោក​បាន​បាត់បង់​រដ្ឋបុរស​ម្នាក់ » នេះ​ជា​ប្រតិកម្ម​របស់​ប្រមុខ​ការពារជាតិ​អាមេរិក​លោក​ឡយដ៏ អូស្ទីន មុន​នឹង​បន្ថែម​ថា លោក​ខូលីន ផូវែល​ជា​មិត្ត និង​ជា​មនុស្ស​គំរូ​ម្នាក់​សម្រាប់​លោក។ សម្រាប់​លោក Dick Cheney អតីត​អនុប្រធានាធិបតី​អាមេរិក​ក្នុង​ជំនាន់​លោក Bush កូន​បាន​ថ្លែង​ថា លោក​ខូលីន ផូវែល​ជា​ឥស្សរជន​លេចធ្លោ​ម្នាក់​នៅ​ក្នុង​ភាព​ជា​អ្នកដឹកនាំ​យោធា និង​នយោបាយ​អាមេរិក។ ចំណែក​ប្រធានាធិបតី​អាមេរិក​សព្វថ្ងៃ​លោក​ចូ បៃដិន​បាន​ថ្លែង​ថា លោក​ខូលីន ផូវែល​ជា​និមិត្តរូប​នៃ​កងទ័ព និង​ការទូត។ គួរ​បញ្ជាក់​បន្តិច​ថា លោក​ខូលីន ផូវែល​ជា​អ្នក​សាធារណរដ្ឋ តែ​លោក​មិន​ញញើត​នឹង​ដក​ខ្លួន​ឆ្ងាយ​ពី​គណបក្ស​របស់​លោក​ទេ។ ជាក់ស្តែង​ក្នុង​ឆ្នាំ ២០០៨ លោក​បាន​បោះឆ្នោត​ឲ្យ​លោក​បារ៉ាក់ អូបាម៉ា ហើយ​ក្នុង​ឆ្នាំ ២០២០ កន្លង​ទៅ លោក​ផូវែល​បាន​ប្រកាស​ពី​ការ​បោះឆ្នោត​ឲ្យ​លោក​ចូ បៃដិន​ដោយ​បាន​បរិហារ​លើ​ការ​និយាយ​ភូតភរ​របស់​លោក​ដូណាល់ ត្រាំ៕
    10/19/2021
    6:44

Acerca de ព្រឹត្តិការណ៍អន្តរជាតិប្រចាំថ្ងៃ

Sitio web de la emisora

Escucha ព្រឹត្តិការណ៍អន្តរជាតិប្រចាំថ្ងៃ, ព្រឹត្តិការណ៍​កម្ពុជា​ប្រចាំថ្ងៃ y muchas más emisoras de todo el mundo con la aplicación de radio.es

ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Descarga la aplicación gratis y escucha radio y podcast como nunca antes.

Tienda de Google PlayApp Store

ព្រឹត្តិការណ៍អន្តរជាតិប្រចាំថ្ងៃ: Podcasts del grupo

ព្រឹត្តិការណ៍អន្តរជាតិប្រចាំថ្ងៃ: Radios del grupo

Information

Debido a las restricciones de su navegador no es posible reproducir directamente esta emisora en nuestro sitio web.

Sin embargo, puedes escuchar la emisora en el reproductor emergente de radio.es.

Radio