Partner im RedaktionsNetzwerk Deutschland
Página inicialPodcastsNoticias
ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Podcast ព្រឹត្តិការណ៍អន្តរជាតិប្រចាំថ្ងៃ
Podcast ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Guardar

Episodios disponibles

5 de 23
  • របាយការណ៍៖ ​ប្រជាធិបតេយ្យកំពុង​ធ្លាក់​ចុះ​ ប្រទេស​ផ្តាច់ការកាន់តែ​ផ្តាច់ការ
    វិទ្យាស្ថាន​អន្តរជាតិ​ដើម្បី​ប្រជាធិបតេយ្យ​និង​ជំនួយ​ការ​បោះឆ្នោត IDEA International បាន​ចេញ​​របាយការណ៍​ថ្មី នៅ​​ថ្ងៃពុធ​ទី ៣០​វិច្ឆិកា ស្តី​អំពី​ស្ថានភាព​​ប្រជាធិបតេយ្យ​នៅលើ​ពិភពលោក។ បើតាម​របាយការណ៍ បន្ថែម​ដោយសង្គ្រាម​​អ៊ុយក្រែន និង​វិបត្តិ​សេដ្ឋកិច្ច ​ ​ប្រព័ន្ធ​នយោបាយបែប​​ប្រជាធិបតេយ្យ បាន​និង​កំពុង​​ធ្លាក់​ចុះ​ ក្នុងប្រមាណ​​ពាក់កណ្តាលនៃ​ប្រទេស​​​​ប្រជាធិបតេយ្យនៅលើ​ពិភពលោក​។ របាយការណ៍​របស់​វិទ្យាស្ថានអន្តរជាតិ​ដើម្បី​ប្រជាធិបតេយ្យ​និង​ជំនួយការ​បោះឆ្នោត​ IDEA ដែល​មាន​ទីស្នាក់ការ​នៅប្រទេស​ស៊ុយអែត លើក​ឡើង​អំពី​ ការ​ធ្លាក់​ចុះ នៃ ប្រព័ន្ធ​នយោបាយ​​​ប្រជាធិបតេយ្យ​ ក្នុង​ប្រទេស​ប្រជាធិបតេយ្យ​ដល់​ទៅ​ពាក់កណ្តាល ដោយ​សម្គាល់​ឃើញ​ថា ប្រទេសទាំង​​នោះ​ចាប់​ផ្តើម​អស់​ជំនឿ​លើ​ការ​បោះឆ្នោត ចាប់​ធ្វើ​អ្វី​ដែល​ប៉ះពាល់​ដល់​ច្បាប់​រដ្ឋ ឬ​ក៏​រារាំង​បង្ក​ឧបសគ្គ​ដល់​សិទ្ធិ​ស៊ីវិល។ លោក​ Kevin Casas Zamora អគ្គលេខាវិទ្យាស្ថាន​​IDEA​ បាន​ប្រកាស​ថា មាន​​កត្តាអាក្រក់​សម្រាប់​​លទ្ធិប្រជាធិបតេយ្យ​លេច​ឡើង​ច្រើន​ខ្លាំង​ណាស់​នៅពេល​បច្ចុប្បន្ននេះ​។ ផលវិបាក​នៃ​វិបត្តិ​សេដ្ឋកិច្ច​ បង្ក​ឡើង​ដោយ​ជំងឺ​រាតត្បាត​សកល​  និង​ផលវិបាក​សេដ្ឋកិច្ច​​នៃសង្គ្រាម​នៅ​អ៊ុយក្រែន បាន​មក​ជាន់​ពន្លិច​ប្រជាធិបតេយ្យ​ឱ្យ​កាន់​តែដុនដាប​បន្ថែម​ទៀត។ ការ​ធ្លាក់​ចុះ​នៃ​ប្រព័ន្ធប្រជាធិបតេយ្យ​ ដែល​ធ្ងន់ធ្ងរ​ខ្លាំង​ រហូត​អាច​រាប់​បញ្ចូល​បាន​ក្នុង​បញ្ជី​ឈ្មោះ​ប្រទេស​ដើរថយ​ក្រោយ​ផ្នែក​ប្រជាធិបតេយ្យ បាន​កើន​ឡើង​ពី​៦​ទៅ​៧​ប្រទេស​ នៅ​ឆ្នាំ​២០២២​នេះ​ និង​បើ​ប្រៀប​ទៅ​នឹង​ឆ្នាំ​មុន។ នៅក្នុង​ចំណោម​១៧៣​ប្រទេស​ ដែលអ្នក​វិភាគ​​បាន​សិក្សា ​​៥២ប្រទេស​ ​បាន​មាន​ស្ថានភាពប្រជាធិបតេយ្យ​ធ្លាក់​ចុះ​ និង​២៧​ប្រទេស​បាន​របូត​ទៅ​ជា​ប្រទេស​ផ្តាច់ការ។ ជា​សរុប​ ជាង​ពាក់​កណ្តាល​នៃ​ប្រទេស​លើ​ពិភពលោក​បាន​បែរខ្នង​ដាក់លទ្ធិ​ប្រជាធិបតេយ្យ។ ប្រព័ន្ធ​នយោបាយ​ប្រជាធិបតេយ្យ​ រយៈ​ពេល​៥​ឆ្នាំ​ចុងក្រោយ​នេះ បាន​ធ្លាក់​ចុះ​ខ្លាំង ស្ទើរ​ត្រលប់​ទៅ​ស្មើនឹង​ស្ថានភាព​ប្រជាធិបតេយ្យ​កាលពី​ទសវត្សរ៍​ឆ្នាំ​៩០ សម្រាប់​ប្រទេស​ខ្លះ។ នេះ​បើ​តាម​របាយការណ៍​ដដែល។ ​​​ពី​ប្រជាធិបតេយ្យទៅ​ផ្តាច់ការ នៅក្នុង​ចំណោម​ប្រទេស​ដែល​ប្រជាធិបតេយ្យ​ថយ​ចុះខ្លាំង មាន​សហរដ្ឋ​អាមេរិក​ ប្រេស៊ីល ហុងគ្រី ប៉ូឡូញ ឥណ្ឌា កោះម៉ូរីស និង​សាល់វ៉ាដរ។ សម្រាប់​លោកអគ្គលេខា​វិទ្យាស្ថាន​សិក្សា​ប្រជាធិបតេយ្យ​និង​ជំនួយ​ការបោះឆ្នោត ករណី​សហរដ្ឋ​អាមេរិក បង្កប់​ការ​ព្រួយបារម្ភ​ជា​ពិសេស​តែម្តង ព្រោះ​បន្ទាប់​ពី​បោះឆ្នោត​ប្រធានាធិបតី​ -មាន​រដ្ឋាភិបាល​ថ្មី​ហើយក៏​ដោយ​ ក៏​ភាព​ប្រេះ​ឆា​នៅ​ខ្លាំង និង​មិន​នៅ​តែ​មាន​ការ​ប៉ុនប៉ង​បដិសេធ​លទ្ធផល​បោះឆ្នោត​ទៀត។​ របាយការណ៍​បាន​កត់​សម្គាល់​ឃើញ​​ថា​ប្រទេស​នេះ​កំពុង​ប្រឈម​នឹង​បញ្ហា​ពុះ​ចែក​​នយោបាយ​ជា​ពីរ​ប៉ូល​ ​វិបត្តិសា្ថប័ន​ និង​ការ​គំរាមកំហែង​​សេរីភាព​ស៊ីវិល។ សហរដ្ឋ​អាមេរិក​ បាន​ដើរ​ថយក្រោយ​យ៉ាង​ច្បាស់​ក្រលែត​ដែរ ក្នុង​វិស័យ​សិទ្ធិសេរីភាព​ផ្លូវភេទ​និង​បង្កកំណើត ក្នុង​ខណៈ​ដែល​ប្រទេស​ជា​ច្រើន​កំពុង​ពង្រីកសេរីភាព​នេះ។ នេះ​បើ​តាម​ទស្សនៈ​របស់​លោក​អគ្គលេខា​វិទ្យាស្ថាន​IDEAដដែល។ អឺរ៉ុប​ក៏​មិន​គ្រាន់​បើ​។ ក្រុម​ប្រជាភិថុត ជាតិនិយមជ្រុល​ បាន​ឡើង​សំឡេង​ជា​លំដាប់។ ជិត​ពាក់​កណ្តាល​នៃ​ប្រទេស​នៅអឺរ៉ុប ឬ​ត្រូវ​ជា​១៧​ប្រទេស​ មាន​ប្រជា​ធិបតេយ្យ​ធ្លាក់​ចុះ។​ បើ​និយាយ​អំពី​តំបន់​អាស៊ី​ដែល​ប្រជាជន​ប្រមាណ​៥៤%​ ស្គាល់​រសជាតិ​ប្រជាធិបតេយ្យ​វិញ របប​ផ្តាច់ការ​កាន់​តែ​ត្រូវ​បាន​ពង្រឹង ឬ​និយាយ​ឱ្យ​ស្តាប់​ គឺ​កាន់​តែ​ផ្តាច់ការ។ របាយការណ៍​ដដែល​នេះ បាន​បញ្ជាក់​ថា ពាក់​កណ្តាល​នៃ​ប្រទេស​ផ្តាច់ការ កាន់តែ​ផ្តាច់ការ និង​បាន​បង្កើន​គំនាប​កាន់​តែ​ខ្លាំង នៅឆ្នាំ​២០២២។ អាហ្វហ្កានីស្ថាន បេឡារុស្ស៊ី កម្ពុជា កូម័រ និង​នីការ៉ាហ្គ័រ ស្ថិត​ក្នុង​ចង្កោម​ប្រទេស​ដែល​មាន​ស្ថានភាព​ប្រជាធិបតេយ្យ​ធ្លាក់​ចុះ​ជារួម​​តែម្តង។ ចំណែក​ទ្វីបអាហ្វ្រិកវិញ មិនបាច់​រាប់​ទេ។ ទ្វីប​នេះ​នៅ​តែ​ប្រឈម​នឹង​អស្ថិរភាព​នយោបាយ​យ៉ាង​ខ្លាំង បើ​ទោះ​បី​ប្រឹង​ជំនះ​ឧបសគ្គ​បាន​ច្រើន​ហើយ​ក៏​ដោយ។ ប៉ុន្តែសម្រាប់​របាយការណ៍ ដើម​បូព៌ាជា​តំបន់​ដែល​មាន​អំណាច​ផ្តាច់​ការជាង​គេ​​បំផុតនៅលើ​ពិភពលោក​។ ១០​ឆ្នាំ​ក្រោយ​បដិវត្ត​អារ៉ាប់ តំបន់​រាប់​មាន​ប្រទេស​ប្រជាធិបតេយ្យ​តែ​បី​ប៉ុណ្ណោះ​​ គឺ អ៊ីរ៉ាក់ អ៊ីស្រាអែល និង​លីបង់។ របាយការណ៍​បាន​គូសបញ្ជាក់​ អំពី​សញ្ញា​នៃ​ភាពជឿន​លឿន ​ប្រសើរ​ឡើង​ខ្លះ​ដែរ នៅទ្វីប​អាមេរិកឡាទីន ដែល​ប្រជាជន​ យុវវ័យ អាច​ប្រមូល​ផ្តុំ​គ្នា​ធ្វើ​បាតុកម្ម​រហូត​ជំរុញ​ឱ្យ​រដ្ឋាភិបាល​ព្រម​ផ្តល់​ដំណោះស្រាយ​ប្រចាំ​សតវត្សរ៍ ទាក់​ទង​នឹង​សិទ្ធិ​បង្ក​កំណើត ដើម្បី​អាកាសធាតុ​​។ នៅអ៊ីរ៉ង់ ប្រជាជន​ចាប់​ផ្តើម​ហ៊ាន​ចេញ​ធ្វើ​បាតុកម្ម​ដើម្បី​ទាមទារ​សេរីភាព សមភាព និង​សេចក្តី​ថ្លៃថ្នូរ។ និន្នាការ​ជា​ទូទៅ​មិន​ល្អ​មែន តែ​សម្រាប់​​លោក​ Casas-Zamoras នេះ​ជា​សញ្ញា​នៃ​​ក្តី​សង្ឃឹម។ ជំនួបកំពូល​​ប្រជាធិបតេយ្យ​លើក​ទីពីរ ដើម្បី​ជួយ​ទ្រទ្រង់​និង​ស្តារ​ប្រជា​ធិបតេយ្យ ម្សិលមិញ លោក​ប្រធានាធិបតី​អាមេរិក ចូ បៃដិន បាន​ចេញសេចក្តី​ថ្លែងការណ៍​ ប្រកាស​រៀបចំ “​ជំនួបកំពូល​ប្រជាធិបតេយ្យ”​ ជា​លើក​ទីពីរ នៅ​ថ្ងៃទី ២៩និង​៣០​មីនា ឆ្នាំ​២០២៣។ ​ជាអ្នក​ផ្តួចផ្តើម​គំនិត​ អាមេរិក​សហការ​ដឹកនាំ​ជំនួបកំពូល​ជាមួយ​កូស្ការីកា ហូឡង់ កូរ៉េខាង​ត្បូង និង​ហ្សំប៊ី ដើម្បី​ផ្តល់​គំនិត​សកល​ឱ្យ​រដ្ឋាភិបាល​​លើ​ពិភពលោក​ជ្រើសរើស​វិធី​ដឹកនាំ​ប្រកប​ដោយ​ទំនួល​ខុស​ត្រូវ មាន​តម្លាភាព និង​គោរព​សិទ្ធិ​មនុស្ស។ ជំនួប​នេះ នឹង​បង្ហាញ​ឱ្យ​ឃើញ​ថា​ប្រជាធិបតេយ្យ​ផ្តល់​ផល​ល្អ​យ៉ាង​ណា​ដល់​ប្រជាពលរដ្ឋ​ និង​ជា​មធ្យោបាយល្អ​ប៉ុនណា​សម្រាប់​​តតាំង​នឹង​វិបត្តិ​ពិភពលោក។ សេតវិមាន​បាន​អះអាង​ថា តាំង​ពី​ជំនួបកំពូល​ប្រជាធិបតេយ្យ​លើក​ទីមួយ ដែល​ប្រព្រឹត្ត​ទៅ​តាម​អន​ឡាញ​មក រដ្ឋាភិបាល​វត្តមាន បាន​ធ្វើ​សេចក្តីសម្រេចចិត្ត​ដ៏​សំខាន់​មួយ​ ដើម្បី​ស្ថាបនា​ប្រជាធិបតេយ្យ​ដ៏​រឹងមាំ ធន់​ខ្លាំង ដើម្បីការពារ​សិទ្ធិមនុស្ស​ និង​ដើម្បី​ប្រយុទ្ធ​ប្រឆាំង​នឹង​អំពើ​ពុករលួយ។ ប្រទេស​អ្នក​ចូល​រួម​ក៏​បាន​ធ្វើ​ការ​រួម​គ្នាដែរ​​ដើម្បី​ស៊ូ​នឹង​ទង្វើ​ឈ្លានពាន​បែប​ផ្តាច់ការ៕
    11/30/2022
    6:24
  • ប្រធានាធិបតីបារាំងលោកម៉ាក្រុងផ្តើមទស្សនកិច្ចលើកទី២ នៅអាមេរិកនៅក្នុងបរិបទសង្រ្គាមអ៊ុយក្រែន
    នៅ​ថ្ងៃ​អង្គារ ទី២៩ វិច្ឆិកា ប្រធានាធិបតី​បារាំង​លោក​ម៉ាក្រុង​ផ្តើម​ទស្សនកិច្ច​ផ្លូវរដ្ឋ​រយៈពេល ៣ថ្ងៃ​នៅ​សហរដ្ឋអាមេរិក​តាម​ការ​អញ្ជើញ​របស់​ប្រធានាធិបតី​អាមេរិក​លោក​ចូ បៃដិន។ នេះ​ជា​ទស្សនកិច្ច​ផ្លូវរដ្ឋ​លើកទី២ របស់​លោក​ម៉ាក្រុង​នៅ​សហរដ្ឋអាមេរិក បន្ទាប់​ពី​ទស្សនកិច្ច​ផ្លូវរដ្ឋ​លើកទី១ កាល​ពី​ខែ​មេសា ឆ្នាំ ២០១៨។ កំណត់សម្គាល់​មួយ​ទៀត ទស្សនកិច្ច​ផ្លូវរដ្ឋ​លើកទី២ របស់​លោក​ម៉ាក្រុង​នៅ​អាមេរិក​ពេល​នេះ​ធ្វើ​ឡើង​នៅ​ក្នុង​បរិបទ​នៃ​សង្រ្គាម​រុស្ស៊ី​ឈ្លានពាន​អ៊ុយក្រែន។ មាន​ចំណុច​កត់សម្គាល់​មួយ​ចំនួន​ដែល​គួរ​និយាយ ទី១ ទស្សនកិច្ច​ផ្លូវរដ្ឋ​របស់​ប្រធានាធិបតី​បារាំង​លោក​ម៉ាក្រុង​នៅ​អាមេរិក​ពេល​នេះ​ជា​ទស្សនកិច្ច​ផ្លូវរដ្ឋ​ទី១ ដែល​ប្រធានាធិបតី​អាមេរិក​លោក​បៃដិន​បាន​រៀបចំ​ទទួល និង​ទី២ លោក​ម៉ាក្រុង​ជា​ប្រធានាធិបតី​បារាំង​ទី១ ដែល​ត្រូវ​បាន​រដ្ឋបាល​អាមេរិក​អញ្ជើញ​ឲ្យ​ទៅ​បំពេញ​ទស្សនកិច្ច​ផ្លូវរដ្ឋ​ចំនួន​ពីរ​ដង។ តែ​ទស្សនកិច្ច​ផ្លូវរដ្ឋ​ចំនួន​ពីរ​ដង​បាន​ធ្វើ​ឡើង​នៅ​ក្នុង​រដ្ឋបាល​អាមេរិក​ខុស​ប្រធានាធិបតី​គ្នា និង​នៅ​ក្នុង​បរិបទ​មិន​ដូច​គ្នា។ ទស្សនកិច្ច​ផ្លូវរដ្ឋ​លើក​ទី១ បាន​ធ្វើ​ឡើង​កាល​ពី​ខែ​មេសា ឆ្នាំ ២០១៨ នៅ​ក្នុង​ជំនាន់​ប្រធានាធិបតី​អាមេរិក​លោក​ដូណាល់ ត្រាំ។ កាល​ណោះ លោក​ត្រាំ និង​លោក​ម៉ាក្រុង​ជា​ប្រធានាធិបតី​ដែល​ទើប​ចូល​កាន់​តំណែង​ថ្មីថ្មោង​ដូច​គ្នា។ នៅ​ក្នុង​ទស្សនកិច្ច​ផ្លូវរដ្ឋ​លើក​ទី២ របស់​លោក​ម៉ាក្រុង​ពេល​នេះ លោក​ម៉ាក្រុង​មិនមែន​ជា​ប្រធានាធិបតី​ដែល​ទើប​កាន់​តំណែង​ថ្មីថ្មោង​ដូច​លោក​បៃដិន​ទេ នោះ​ទោះ​បី​ជា​លោក​បៃដិន​ធ្លាប់​កាន់​តំណែង​អនុប្រធានាធិបតី​នៅ​ក្នុង​ជំនាន់​ប្រធានាធិបតី​អាមេរិក​លោក​បារ៉ាក់ អូបាម៉ា​ក៏​ដោយ។ ទោះ​ជា​យ៉ាង​នេះ​ក្តី បារាំង​បាន​សាទរ និង​ចាត់​ទុក​ការ​អញ្ជើញ​របស់​លោក​បៃដិន​ជា​កិត្តិយស​មួយ​ដែល​លោក​បៃដិន​ផ្តល់​ឲ្យ​បារាំង​ជាជាង​ឲ្យ​ប្រទេស​អឺរ៉ុប​ផ្សេង​ទៀត។ ចំណែក​អ្នក​នាំ​ពាក្យ​ក្រុមប្រឹក្សា​សន្តិសុខជាតិ​នៃ​សេតវិមាន​លោក​ចន កឺប៊ី​បាន​ថ្លែង​ដោយ​សរសើរ​លោក​ម៉ាក្រុង​ជា​ប្រធានាធិបតី​ស្វាហាប់​ក្នុង​នាម​បារាំង​ជា​ប្រទេស​មហាអំណាច​នុយក្លេអ៊ែរ​មួយ​នៅ​អឺរ៉ុប។ អ៊ុយក្រែន​ជា​ប្រធានរឿង​មិន​អាច​ខ្វះ​បាន វត្តមាន​លើកទី២ របស់​ប្រធានាធិបតី​បារាំង​លោក​ម៉ាក្រុង​លើ​ទឹកដី​អាមេរិក​ពេល​នេះ​ធ្វើ​ឡើង​នៅ​ក្នុង​បរិបទ​នៃ​សង្រ្គាម​រុស្ស៊ី​ឈ្លានពាន​អ៊ុយក្រែន។ ដូច្នេះ​ចង់ ឬ​មិន​ចង់ អ៊ុយក្រែន​ជា​ប្រធានរឿង​មិន​អាច​ខ្វះ​បាន​នៅ​ក្នុង​ជំនួប​ទ្វេភាគី​ម៉ាក្រុង បៃដិន រួម​ទាំង​ទំនាក់ទំនង​ទ្វេភាគី​អឺរ៉ុប អាមេរិក និយាយ​ជា​រួម និង​ទំនាក់ទំនង​ទ្វេភាគី​បារាំង អាមេរិក និយាយ​ដោយឡែក។ តែ​គេ​អាច​និយាយ​បាន​ថា សង្រ្គាម​រុស្ស៊ី​ឈ្លានពាន​អ៊ុយក្រែន​បាន​ដាស់​បស្ចិមលោក​ឲ្យ​ភ្ញាក់ខ្លួន​ជាង​ពេល​ណាៗ​ទាំង​អស់។ តាម​រយៈ​សង្រ្គាម​ដែល​គ្មាន​នរណា​នឹក​ស្មាន​ដល់​មួយ​នេះ​បាន​ធ្វើ​ឲ្យ​បស្ចិមលោក​ទាញ​បាន​មេរៀន​ច្រើន​ណាស់ ពិសេស​អសមត្ថភាព​ក្នុង​ការ​ឆ្លើយ​តប​នឹង​មហិច្ឆតា​យោធា​របស់​រុស្ស៊ី។ ពិត​ណាស់​នៅ​ក្នុង​សង្រ្គាម​អ៊ុយក្រែន អឺរ៉ុប និង​អាមេរិក​បាន​ពួត​ដៃ​គ្នា​គាំទ្រ និង​ជួយ​អ៊ុយក្រែន​គ្រប់បែប​យ៉ាង ពិសេស​អាវុធ ព្រម​ទាំង​ដាក់​ទណ្ឌកម្ម​សង្កត់ ក រុស្ស៊ី​តាម​ផ្លូវ​សេដ្ឋកិច្ច។ តែ​ទន្ទឹម​គ្នា​នេះ អឺរ៉ុប និង​អាមេរិក​ហាក់​គ្មាន​ជំហរ​ដូច​គ្នា​នៅ​ក្នុង​ដំណោះស្រាយ​ដើម្បី​បញ្ចប់​សង្រ្គាម​មួយ​នេះ។ ខណៈ​ដែល​លោក​បៃដិន​គិត​តែ​ពី​ផ្តល់​ជំនួយ​ឲ្យ​អ៊ុយក្រែន និង​គាប​រុស្ស៊ី លោក​ម៉ាក្រុង​បាន​ជួយ​អ៊ុយក្រែន និង​បន្ត​មាន​កិច្ច​សន្ទនា​ជាមួយ​ប្រធានាធិបតី​រុស្ស៊ី​លោក​ពូទីន​ដោយ​សង្ឃឹម​ថា សង្រ្គាម​បិទបញ្ចប់​នៅ​តុ​ចរចា​ក្នុង​ថ្ងៃ​ណា​មួយ​ដែល​ភាគី​ជម្លោះ​សម្រេច​ចូល​តុ​ចរចា។ តែ​គំនិត​របស់​លោក​ម៉ាក្រុង​របៀប​នេះ​ហាក់​បាន​ធ្វើ​ឲ្យ​លោក​បៃដិន​ទើស​ទាល់​ចិត្ត​យ៉ាង​ខ្លាំង។ បារាំង​មិន​សប្បាយចិត្ត​នឹង​នយោបាយ​ការពារនិយម​របស់​អាមេរិក ទំនាក់ទំនង​ទ្វេភាគី​បារាំង អាមេរិក​ហាក់​កំពុង​បន្ត​បំពុល​ដោយ​សម្ព័ន្ធ​ត្រីភាគី​អាមេរិក អូស្រ្តាលី និង​អង់គ្លេស​ហៅ AUKUS ដែល​បាន​ចុះ​ហត្ថលេខា​ក្នុង​ក្រុង​វ៉ាស៊ីនតោន​កាល​ពី​ខែ​កញ្ញា ឆ្នាំ ២០២១។ តាម​រយៈ​សម្ព័ន្ធ​ត្រីភាគី AUKUS មួយ​នេះ​កាល​ណោះ​បាន​ធ្វើ​ឲ្យ​បារាំង​ក្តៅ​ស្លឹកត្រចៀក ខឹងសម្បារ​យ៉ាង​ខ្លាំង។ មូលហេតុ គឺ​មក​ពី​អូស្រា្តលី​បាន​លុប​ចោល​កិច្ចសន្យា​ទិញ​នាវាមុជទឹកបារាំង​ចំនួន ១២គ្រឿង​ដែល​មាន​ទឹកប្រាក់ ៣១​ពាន់​លាន​អឺរ៉ូ និង​បាន​ងាក​ទៅ​ទិញ​នាវាមុជទឹក​អាមេរិក​ដើរ​ដោយ​នុយក្លេអ៊ែរ​វិញ។ ទង្វើ​របស់​អូស្រា្តលី​កាល​ណោះ​បាន​ធ្វើ​ឲ្យ​បារាំង​ពិបាក​លេប ទោះ​បី​ជា​អូស្រា្តលី​ប្រឹង​លើក​យក​ហេតុផល​អ្វី​ទៅ​ពន្យល់​ក៏​ដោយ។ លើស​ពី​នេះ បារាំង​មិន​ញញើត​វាយប្រហារ​អាមេរិក​ចំ​មុខ​ដោយ​ចោទ​ជា​ទង្វើ​ក្បត់​រវាង​សម្ព័ន្ធមិត្ត។ ប្រមុខ​ការទូត​បារាំង​ពេល​នោះ​លោក​ហ្សង់អ៊ីវ ឡឺឌ្រីយ៉ង់​បាន​ប្រើ​ពាក្យ​ធ្ងន់ៗ និង​មិន​សំចៃមាត់​ដាក់​អាមរិក​ថា មាន​ចិត្ត​វៀចវេរ មើលងាយ និង​និយាយ​ភូតភរ។ តែ​រឿង​មួយ​ជា​រឿង​កន្លង​ហួស​ដែល​ប្រហែល​លោក​ម៉ាក្រុង​មិន​លើក​ទៅ​និយាយ​ទេ។ ប្រធានរឿង​ដែល​លោក​ម៉ាក្រុង​ត្រូវ​និយាយ​ដោយ​ខាន​មិន​បាន​ទាក់ទង​នឹង​ពាណិជ្ជកម្ម។ នេះ​ជា​រឿង​វិវាទ​មួយ​ដែល​លោក​ម៉ាក្រុង​ត្រូវ​និយាយ​ត្រង់​ទៅ ត្រង់​មក​ជាមួយ​លោក​បៃដិន។ ក្រុង​ប៉ារីស​កំពុង​មិន​សប្បាយចិត្ត​នឹង​មហា​ផែនការ​វិនិយោគ​រាប់​ពាន់​លានដុល្លារ​របស់​លោក​បៃដិន​ដែល​បាន​ជួយ​គាំទ្រ​វិស័យ​រថយន្ត និង​វិស័យ​ថាមពល​បៃតង​សម្រាប់​តែ​រោងចក្រ​សហគ្រាស​អាមេរិក។ លោក​ម៉ាក្រុង​បាន​ចាត់​ទុក​មហា​ផែនការ​វិនិយោគ​មួយ​នេះ​របស់​លោក​បៃដិន​ជា​មហាផែនការ​អាត្មានិយម​ដែល​ការពារ​តែ​ផលប្រយោជន៍​អាមេរិក។ អ្វី​ដែល​លោក​ម៉ាក្រុង​ចង់​បាន គឺ​ចង់​ឲ្យ​លោក​បៃដិន​គិតគូរ​ផង​ដែរ​ពី​រោងចក្រសហគ្រាស​អឺរ៉ុប ពិសេស​បារាំង​ដែល​កំពុង​បោះទុន​រកស៊ី​លើ​ទឹកដី​អាមេរិក៕
    11/29/2022
    6:32
  • បង្ក្រាប​​​ចលនាបាតុកម្មហើយ​ ចិនប្រកាស​​បន្ត​ការពារ​យុទ្ធសាស្ត្រ​សូន្យ​​កូវីដ
    ​ក្រោយលេច​​​ចលនា​បាតុកម្ម​ដ៏​កម្រ​និងក្នុង​សន្ធឹក​​ជា​ប្រវត្តិសាស្ត្រ ​នៅប៉េកាំង ព្រមទាំង​​នៅ​​តាម​ទីក្រុងធំៗ​​ជា​ច្រើន​ ប្រឆាំង​នឹងនយោបាយ​ “សូន្យកូវីដ”មក នៅថ្ងៃ​ចន្ទ​ទី ២៨​វិច្ឆិកា​នេះ អាជ្ញាធរ​ចិនប្រកាស​ថា​យុទ្ធសាស្ត្រប្រឆាំង​កូវីដនឹង​ទទួល​បាន​ជោគជ័យ និង​ ​បានចាប់​ផ្តើម​ចាត់វិធានការ​រឹត​បន្តឹង​យ៉ាង​ខ្លាំង។ ​មាន​ការ​ចាប់​ខ្លួន ដោយ​មិន​រើស​មុខ និង​​ដោយ​ដល់​អ្នក​កាសែត​របស់​ទូរទស្សន៍​អង់គ្លេស​BBC​ម្នាក់​ផង។ ​​អង់គ្លេស​បាន​បញ្ចេញ​ប្រតិកម្ម​យ៉ាង​ខ្លាំង។ មិនដែល​ធ្លាប់​មាន​ទេ សន្ទុះ​បាតុកម្មព្រមគ្នា​​ស្ទើរ​ទូទាំង​ប្រទេស​ដូច្នេះ គិត​ចាប់​តាំង​ពីមហាបាតុកម្មប្រជាធិបតេយ្យ​​នៅ​ទីលាន​ធានអាន់មៀន​កាលពី​​ឆ្នាំ​១៩៨៩មក។ តែ​នៅ​ថ្ងៃ​ចន្ទ​នេះ​​ គេ​ពុំ​ឃើញ​មាន​សញ្ញា​តវ៉ា​ប្រមូល​ផ្តុំ​គ្នា នៅក្រុង​ប៉េកាំង ឬ​នៅ​សៀងហៃ​ទេ។ នៅ​តាម​ផ្លូវ​គេ​ឃើញ​តែ​វត្តមាន​ប៉ូលិស​យ៉ាង​ច្រើន​សន្ធឹកសន្ធាប់​ ស្ទើរគ្រប់​ជ្រុង ត្រង់​កន្លែង​ដែល​មាន​បាតុកម្ម និង​ការ​ប៉ះទង្គិច​រវាង​កងកម្លាំង​មាន​សមត្ថកិច្ច​និង​បាតុករ​ កាលពី​យប់​មិញ​ប៉ុណ្ណោះ។ តាំងពី​ថ្ងៃ​សុក្រ​ ជាពិសេសនៅ​ថ្ងៃ​អាទិត្យ​ម្សិលមិញ តាំងពី​ព្រលឹម​អុល​ដល់​អាធ្រាត្រ យុវ​និស្សិត យុវជន​យុវនារី ពលរដ្ឋ​ក្មេង​ចាស់​ប្រុសស្រី នាំ​គ្នា​ជំនះ​បម្រាម ចេញ​តវ៉ា ស្រែក​ទាមទារ​សេរីភាព និង​ហ៊ាន​ដល់​ថ្នាក់​ទាមទារ​ឱ្យ​លោកប្រធានាធិបតី​ ស៊ីជីនពីង លាលែង​ចេញ​ពី​តំណែង​ផង។ “មិនធ្វើតេស្តកូវីដទេ យើង​ឃ្លាន​! ស៊ីជីនពីង ដក​ខ្លួន​ចេញ​តំណែង​ទៅ ! យើងចង់​បាន​សេរីភាព មិន​ត្រូវការ​ការ​បិទ​ខ្ទប់ ។ល។ និង។ល។” សុទ្ធ​សឹង​ជា​ពាក្យ​ស្លោក​បន្លឺ​ឡើង​ដោយ​ក្រុមបាតុករ បើ​ទោះ​បី​ជា​ពួកគេ​ដឹង​ថា​នឹង​អាច​រង​ការ​ពិន័យ​និង​ទោស​ធ្ងន់​ក៏​ដោយ។ ​ដោយហេតុ​មាន​ការ​ត្រួត​ត្រា​យ៉ាង​តឹង​តែង​ពី​សំណាក់​អាជ្ញាធរ លើ​ព័ត៌មាន​និង​វិធានការ​ហាមឃាត់​ការ​ធ្វើ​ដំណើរ​ក្នុង​ផ្ទៃប្រទេស​ដើម្បី​ទប់ស្កាត់​កូវីដ គេ​ពុំ​អាច​ផ្ទៀងផ្ទាត់​ថាតើ​មានមនុស្ស​ប៉ុន្មាន​នាក់​បាន​នាំ​គ្នា​ចុះ​ថ្នល់ធ្វើ​បាតុកម្ម​បាន​ទេ។ ពង្រាយ​ប៉ូលិស​និងរឹត​បន្តឹង​អ៊ីនធ័រនែត ក្នុង​អំឡុង​ពេលកំពុង​​ផ្ទុះ​ចលនា​បាតុកម្ម​ គេ​ពុំ​ឃើញ​មេដឹកនាំ​ចិនណា​ម្នាក់​​ចេញ​ស្តី​អ្វី​ទាំងអស់ អាជ្ញាធរ​ហាក់​ទើប​ក្តាប់​ស្ថានការណ៍​បាន​​ថ្ងៃ​នេះ​។ ការ​​ចុះ​ស្ររព្រមគ្នា ​តាំងពី​ប៉េកាំង ដល់​កង់តុង ឆេងឌូ ហុងកុង សៀងហៃ​ ចុងឈីង ស៊ីនជាំង ...ព្រមទាំង​វ៉ូហានដែល​ជា​កន្លែង​ផ្ទុះ​កូវីដ​ដំបូង​គេ​ ធ្វើ​ឡើង​ស្រប​តាម​​ការ​អំពាវនាវ​តាម​ប្រព័ន្ធ​សង្គម ដែល​អាជ្ញាធរ​ចិន​ទំនង​ជា​បិទ​ខ្ទប់​មិន​ទាន់។ អ្នក​ជំនាញ​នយោបាយ​ចិន​នៅសកលវិទ្យាល័យ​សិង្ហបុរី​យល់​ថា គណបក្ស​កុម្មុយនិស្ត​ចិន វាយ​តម្លៃ​​ខុស​។ មើល​ស្រាល​កំហឹង​ប្រជាជន។ អ្វីៗ​ហាក់​ចាប់ផ្តើម​ចូល​ស៊ម​វិញ​នៅថ្ងៃ​ចន្ទនេះ។ គ្រប់ព័ត៌មាន​ទាក់ទង​នឹង​បាតុកម្ម ត្រូវ​បាន​លុប​ចេញ​អស់​ពី​បណ្តាញ​អ៊ីនធ័រនែត​។ នៅ​លើ​បណ្តាញ​​Weibo ការ​ស្វែង​រក​ពាក្យ​ស្ទឹង Liangma ផ្លូវUrumqi ដែល​ជា​ទីតាំង​បាតុកម្ម គ្មានផ្តល់​​លទ្ធផល​អ្វីទាំងអស់។ ក្រោយ​ពី​បាន​បង្ក្រាប​បាតុករ​យ៉ាង​ហិង្សានៅយប់​មិញ ការ​ចាប់​ខ្លួន​កំពុង​ចាប់​ផ្តើម​នៅ​ថ្ងៃ​នេះ។ ប៉ូលិស​បាន​ទៅ​​ដល់​ផ្ទះ និង​ដល់​កន្លែង​ធ្វើ​ការ​ ដើម្បី​ចាប់​ខ្លួន​មនុស្ស​ជា​ច្រើន​សិប​នាក់។  ចិន​នឹង​ឈ្នះ​កូវីដ ​ហើយ​បន្ទាប់​ពី​ស្ងាត់​ឈឹង​អស់​ពេញ​មួយ​ចុង​សប្តាហ៍ នៅ​ថ្ងៃនេះ​អ្នក​នាំពាក្យ​​ក្រសួងការបរទេស​ចិន បាន​ចេញ​មក​ពន្យល់​ និង​បន្ទោស​​​សារក្នុង​ប្រព័ន្ធ​សង្គម​ ដែល​​ភ្ជាប់​ហេតុការណ៍​អគ្គីភ័យ​នៅ​ស៊ីងជាំង​ទៅនឹង​វិធានការ​កូវីដ ថា​មាន​បង្កប់​លេស​​ពន្យុះ​ឱ្យ​​ប្រជាពលផ្ទុះ​កំហឹង​ធ្វើ​បាតុកម្ម ប្រឆាំង​នឹង​យុទ្ធសាស្ត្រកូវីដ។ សារព័ត៌មាន​រដ្ឋ​ បាន​លើក​ឡើង​អំពី​ហានិភ័យ​នៃ​ការ​ជាប់គាំង និង​ភាព​ធ្វេសប្រហែសមិន​គោរព​នយោបាយ​សូន្យកូវីដ និង​​មិន​បាន​ណែនាំ​ឱ្យ​បិទ​បញ្ចប់​វិធានការ​នេះ​ទេ។ អាជ្ញាធរ​ចិន​នៅ​តែបន្ត​អះអាង​ថា ការ​ប្រយុទ្ធ​ប្រឆាំងនឹង​​​កូវីដ​របស់​ចិន នឹង​ទទួល​បាន​ជោគជ័យ​ ក្រោម​ការ​ដឹកនាំ​របស់​បក្ស​និងការ​​គាំទ្រ​របស់​ប្រជាជន។ ប៉ុន្តែប្រឈម​នឹង​កំហឹង​​បាតុកម្ម​របស់​ពលរដ្ឋ​ អាជ្ញាធរ​ចិន​ក៏​ព្រម​សម្រប​ខ្លួន​ ដោយ​ប្រកាស​បន្ធូរ​បន្ថយ​វិធានការ​ប្រឆាំង​នឹង​កូវីដ​មួយ​ចំនួន​ធំ​ នៅតំបន់​ស៊ីនជាំង។ ប្រជាពលរដ្ឋ​ ដែល​ខ្លះ​ជាប់​ចត្តាឡីស័ក​តាំងពីជា​ច្រើនសប្តាហ៍​មក​ហើយ អាច​ទៅ​ចេញ​ ជិះ​រថយន្តក្រុង ទៅ​ផ្សារ​ក្បែរផ្ទះ​បាន​ចាប់​ថ្ងៃអង្គារ​ស្អែក​ទៅ។ ហាង​ទំនិញ​ចាំបាច់​សម្រាប់​ជីវភាព​ប្រចាំ​ថ្ងៃ​ក៏​អាច​បើក​ទ្វារ​បាន​វិញ ដោយ​ទទួល​ភ្ញៀវ​តែ​ពាក់​កណ្តាល​សិន។ សកម្មភាព​ដឹកជញ្ជូន​ផ្លូវ​គោក និង​អាកាស​ នឹង​ចាប់​ដំណើរការ​ឡើង​វិញ​ដោយ​សន្សឹមៗ និង​ដោយ​មាន​របៀប។ ​ចាប់​ខ្លួន​អ្នកកាសែតអង់គ្លេសដោយចេតនា ? អង់គ្លេស​បញ្ចេញ​ប្រតិកម្ម​ខ្លាំងណាស់ ដោយ​ប្រកាស​ថា​មិន​អាច​ទទួល​យក​បាន​ទេ ការដែល​ចិន​ចាប់​ខ្លួន​ ហើយ​វាយ​ដំ ព្រមទាំង​ដាក់​ឃ្នោះ​ អ្នក​សារព័ត៌មាន​របស់​ខ្លួន ដែល​ទៅ​យក​ព័ត៌មាន​នៅកន្លែង​បាតុកម្ម​នាទីក្រុង​សៀងហៃ។ ​​បើតាមBBC​ អ្នកកាសែត Ed Lawrence ​បាន​រួច​ខ្លួនភ្លាម​វិញ​ទេ​ ប៉ុន្តែ​គ្មានឡើយ​​ការ​សុំទោស​និង​ពន្យល់​ជា​ផ្លូវការ​ ពី​សំណាក់​អាជ្ញាធ​រ​ចិន​។ មន្ត្រី​ប៉ូលិស​បែរ​ជា​និយាយ​ការពារ​ខ្លួន​បែប​ងើយ​ថា ​ជាការ​ចាប់​ខ្លួន​ដើម្បីការពារ​​សុវត្ថិភាពរបស់​អ្នកកាសែត​​ខ្លាចក្រែង​ឆ្លង​កូវីដនៅក្នុង​ចំណោម​ហ្វូង​មនុស្ស។ សម្រាប់​អង់គ្លេស នេះ​មិនមែន​ជា​ការ​បំភ្លឺ​ដ៏​សមរម្យ​ឡើយ។   ប៉ុន្តែប៉េកាំង​​បាន​ធានា​អះអាង​ថា ការ​ចាប់​ខ្លួន​បាន​ធ្វើ​ឡើង ក្នុង​ពេល​​បង្ក្រាប​បាតុករ និង​មិនមែន​ជា​ការ​​ដៅ​ចាប់​អ្នក​កាសែត​ដែល​ទៅ​យក​ព័ត៌មាន​ ព្រោះ​មិន​បាន​បង្ហាញ​បណ្ណ​អ្នក​សារព័ត៌មាន​ដោយ​ស្ម័គ​ចិត្ត​ទេ។ នេះ​បើ​តាម​ការ​ពន្យល់​របស់​អ្នក​នាំពាក្យ​ក្រសួង​ការបរទេស ក្នុង​ពេល​ធ្វើ​សន្និសីទ​កាសែត ដោយ​ឆ្លៀត​ស្នើ​សុំ​ឱ្យ​បណ្តាញ​ឃោសនា​ព័ត៌មាន​​បរទេស​ទាំង​អស់ គោរព​ច្បាប់​ និងបទ​បញ្ជា​ផ្ទៃក្នុង​របស់​ប្រទេស ក្នុង​ពេល​ស្នាក់​នៅ​ក្នុង​ទឹក​ដីចិន៕
    11/28/2022
    5:58
  • បាតុកម្មនៅចិនច្រើន​ឡើងៗ​ ប្រឆាំង​នឹង​វិធានការ​«កូវីដ​សូន្យ»
    នៅប្រទេស​ចិន ​បីថ្ងៃ​មកហើយ ដែល​ពលរដ្ឋ​​រាប់រយនាក់ ពិសេស​យុវជននិងនិស្សិត នាំគ្នា​បាតុកម្ម​សម្តែង​មតិ​ប្រឆាំង​ជំទាស់​នឹង​យុទ្ធការ​«កូវីដសូន្យ»​របស់​រដ្ឋាភិបាល​កុម្មុយនិស្ត​​។ ​ ថ្ងៃ​អាទិត្យ​ បាតុកម្ម​​រៀបចំ​ធ្វើ​នៅ​ទីក្រុង​សៀងហៃ​ នៅ​ប៉េកាំង នៅ​​តាម​សកលវិទ្យាល័យនានា ព្រមទាំង​នៅ​ក្រុង​មួយ​ចំនួន​ទៀតផង​។  ​ប៉ូលិស​ចិន ​ក៏​បាន​ចាប់ឃាត់​ខ្លួន​បាតុករ​និង​និស្សិត ​ទៅ​ដោយ​ស្ងាត់ៗ​ដែរ។ ​តើ​អ្វីទៅ​ជា​ដើមហេតុនៃបាតុកម្ម​​នៅ​ចិន​នេះ​ ​? ​រឿង​ហេតុ​ដំបូង គឺព្រោះតែ​​អគ្គិភ័យឆេះលំនៅដ្ឋាន​ស្នាក់​នៅ​មួយកន្លែង​ ​ក្នុង​តំបន់​ស៊ីនជាំង គឺនៅក្រុង​វូលូមូជី និង​បណ្តាល​ស្លាប់មនុស្ស១០នាក់​ ​នៅថ្ងៃព្រហស្បតិ៍។ ពលរដ្ឋ​ចិន ពិសេស​ក្រុម​អ្នក​បាតុកម្ម គឺ​បាន​ចោទ​ទៅលើ​«វិធានាការ​កូវីដ​សូន្យ»របស់​រដ្ឋាភិបាល​ចិន​ ដែលដាក់​ចំណាត់​ការ​តឹង​តែង​ពេក និង​​បង្ខំ​ឲ្យ​មនុស្ស​នៅ​ក្នុង​ផ្ទះ ហើយ​និង​ជាបច្ច័យ​មួយ ​រាំងស្ទះ​ដល់​ការ​ចុះជួយ​សង្គ្រោះ​ពន្លត់​អគ្គិភ័យ​។ ​ក្រុម​​​​​ពន្លត់​អគ្គិភ័យ បាន​បរឡាន​ចូល​ទៅ​កន្លែង​កើតហេតុ​ តែ​​មិនទាន់សភាពការណ៍​​។ ​ដ្បិត​ថា នៅម្តុំ​កន្លែងភ្លើង​ឆេះ ​រថយន្ត​ផ្សេងៗចត​​ ​ហើយ​ម្ចាស់រថយន្ត​ត្រូវ​បង្ខាំង​ឲ្យ​នៅក្នុង​ផ្ទះនិង​កន្លែង​ធ្វើ​ចត្តាឡីស័ក​ ។ ហេតុនេះ​ ​គឺវា​​រំខាននិងធ្វើ​ឲ្យ​ក្រុម​ពន្លត់អគ្គិភ័យចូលទៅ​សង្គ្រោះ​ យឺតខ្លាំង​។ អណ្តាតភ្លើង​បាន​ឆេះ​សន្ធោសន្ធៅ និង​សម្លាប់​ផ្តាត់​ជីវិត​មនុស្ស​១០នាក់​។ ត្រង់​នេះ​ហើយ ដែល​ប្រជាជនចិន ក្រុម​អ្ន​កតវ៉ា ​ចោទ​ប្រកាន់​រដ្ឋអំណាច​ និង​ទម្លាក់​កំហុស​លើ​«យុទ្ធធានា​ការ​កូវីដ​សូន្យ»។​ បាតុកម្ម​ស្ទើរគ្រប់ទិស ចាប់ពីថ្ងៃ​សុក្រ​ គឺបីថ្ងៃ​ជាប់គ្នា​នេះ​​ ពលរដ្ឋ​ចិនបានសម្តែង​ក្តី​សោកស្តាយ ទាំង​នៅ​ពិភព​ខាងក្រៅ គឺនៅ​តាម​ផ្លូវ កន្លែងជួបជុំគ្នា ហើយ​និង​ទាំងនៅ​ក្នុង​បណ្តាញ​ប្រព័ន្ធ​សង្គម​នានា​ផង​។​ អ្នក​ខ្លះ​ បាន​​យក​ផ្កា និង​អុជ​ទៀន ទៅ​ដាក់​នៅ​កន្លែង​អគ្គិភ័យ ឧទ្ទិស​ដល់​វិញ្ញាណក្ខន្ធ​មរណជន​ និង​រំលែក​ទុក្ខ​​ព្រួយ​ជាមួយ​គ្រួសារ​សព។​ អ្នក​ខ្លះ​ទៀត សម្តែង​សមានចិត្ត​នៅតាម​អ៊ិនធ័រនែត​។​ បាតុកម្ម​មាន​ជា​ច្រើនកន្លែង​ និង​​ខេត្ត​ផ្សេងៗគ្នា​។ តួយ៉ាងនៅស៊ីនជាំង, ណាន់នីង, វូហាន់, គាន់តុង, សៀងហៃ,  និងប៉េកាំង ។ល។ ពោល​គឺ នៅ​ប៉ែក​ខាង​កើត កណ្តាល ខាងត្បូង​ និង​ខាងលិច បាន​សេចក្តី​ថា ស្ទើរគ្រប់​ទិស​អស់​ហើយ។​ ​នៅបណ្តា​កន្លែង​ជួបគ្នា​ទាំង​នោះ ពួក​បាតុករ ​ច្រៀង ឬ​ចាក់​ចម្រៀង​ជាតិ​ចិន​ ដែល​ចាប់​ផ្តើម​នៅក្នុង​សេចក្តីថា «ត្រូវ​តែ​ងើប​ឈរ ក្រោកឈរ ធ្វើ​ជាមនុស្ស​មិនត្រូវ​ធ្វើ​ជា​ទាសករ​ទេ»។ ថ្ងៃអាទិត្យ បាតុករ​ហ៊ាន​ចេញ​ក្រៅផ្ទះ ​តាំងពី​ព្រលឹម​អុល។​ អ្នក​ខ្លះ ចេញពីលំដៅដ្ឋាន ​តាំងពីម៉ោង​២យប់​ និងខ្លះទៀត ម៉ោង ​៤ ទៀបភ្លឺ ដើម្បី​​មក​ប្រមូល​ផ្តុំ​គ្នារាប់រយនាក់ ​នៅ​កណ្តាល​ក្រុង​សៀវហៃ ដើម្បីរៀបចំ​សម្តែង​មតិ។ តាមសកលវិទ្យាល័យខ្លះ នៅរដ្ឋធានីប៉េកាំង​​ និងក្រុងមួយចំនួនទៀត ក៏​មាន​ការ​សម្តែង​មតិ​ និង​ជួប​ជុំគ្នា ខ្នាត​តូចៗ ខ្លះ​ដែរ​។  ​សកលវិទ្យាល័យ​ Tsinghua នៅប៉េកាំង ដ៏​ល្បីល្បាញ​ គឺ​និស្សិត​ជាង​២-៣០០ នាក់ ប្រជុំគ្នា​បាតុកម្ម​នៅ​ក្នុង​បរិវេណ​ សកលវិទ្យាល័យ តែម្តង។ ​ នគរបាល​ចិន មិន​នៅ​ស្ងៀម​នោះទេ។ ប៉ូលិស​ បាន​ចាប់ខ្លួន​បាតុករ​មួយ​ចំនួន​ ដោយ​គ្មាន​ពន្យល់​មូលហេតុ​ឡើយ។​ ក្នុងបណ្តាញប្រព័ន្ធ​សង្គមវិញ​ គឺកាលណាគេសរសេរឬលើកឡើងពីអ្វីដែលពាក់នឹងការធ្វើដំណើរនៅក្រុង វូលូមូជីកន្លែងភ្លើងឆេះស្លាប់មនុស្ស គឺត្រូវ រដ្ឋអំណាច លុបចោលភ្លាមៗ។ ​ព្រឹត្តិការណ៍​​​នេះ ​ឲ្យ​​គេ​នឹង​ឃើញ​ដល់​ចលនា​ប្រជាជន​និង​និស្សិត​ចិន ​ឆ្នាំ១៩៨៩​ ចំពោះ​ក្រសែភ្នែក​លោកខាងលិច និងកាសែត​បច្ចិមលោក គឺ​គេ​បាន​លើកឡើង​ស្រេចទៅហើយពីការ​ប្រៀបធៀប​គ្នា​បែបនេះ។​ ដ្បិត​ថា​ ពលរដ្ឋចិន ​ស្រេកឃ្លាន​​សេរីភាព និងសិទ្ធិបញ្ចេញ​មតិ​។​ នៅក្នុងការ​ជួប​គ្នា​សម្តែង​មតិ ​​គេ​លួច​ធ្វើ​ស្ងាត់ៗ​​នៅ​ទៀបៗភ្លឺ ​ គឺ​​ពលរដ្ឋ​ចិន​ រាប់រយនាក់​ ​​ស្រែក ថា ឈប់​ធ្វើ​តេស្តកូវីដ, ឈប់​ធ្វើ​ចត្តាឡីស័ក​, បញ្ឈប់​យុទ្ធនាការ​កូវីដសូន្យតែម្តង​ ហើយ​និងខ្លះទៀត ​ស្រែក​ថា ​​ត្រូវទាមទារ​​​សេរីភាព និយាយស្តី​ និង​សិទ្ធិ​ដើរ​ហើរ ជាដើម។  ​មិនតែប៉ុណ្ណោះ  គឺ​​​មានបាតុករ​ខ្លះ ក៏​ហ៊ាន​ទាំង​ស្រែក​ទាមទារ​ឲ្យ​ប្រធានាធិបតី​ចិន ស៊ី ជីនពីង ចុះ​ចេញពី​តំណែង​ និង​ហើយ​ថាឲ្យ​រំលាយ​បក្ស​កុម្មុយនិស្ត ទៀត​ផង​។ ការ​ហ៊ាន​លើកឡើង​ប្រធានបទ​នយោបាយ និង​​សំដៅ​ចំៗ​ដល់​ថ្នាក់ដឹកនាំប្រទេសបែបនេះ គឺ​ក៏ធ្វើ​ឲ្យ​គេ​ព្រួយ​បារម្ភ​ពីការ​បង្គ្រាប​របស់​រដ្ឋអំណាច​កុម្មុយនិស្ត​ក្រុង​ប៉េកាំង​ ដែរ។ ​​អ្នក​ចូល​រួម​បាតុកម្ម​ ភាគច្រើន​ជា​យុវជន និងនិស្សិត​បញ្ញវន្ត ដែល​ស្រដៀង​គ្នា​​នឹង​ការ​​​​បង្ក្រាបចលនានិស្សិត ​នៅ​ទីលាន​ធានអានមែន កាល​ថ្ងៃទី​៤ ខែ​មិថុនា ឆ្នាំ​១៩៨៩។ កាលនោះ មាន​ស្លាប់​មនុស្សរាប់ពាននាក់​។ ទិន្នន័យ​ខ្លះ ថា​ ​១ ម៉ឺននាក់​​​៕
    11/27/2022
    6:30
  • អ៊ុយក្រែន​រំលឹក​​ខួប​៩០ឆ្នាំ​នៃ​គ្រោះ​ទុរ្ភិក្ស​បង្កដោយ​សូវៀត ក្នុង​បរិបទ​សង្គ្រាម​ជាមួយ​រុស្ស៊ី
    សង្គ្រាមរុស្ស៊ី​ចូល​ឈ្លានពាន​​អ៊ុយក្រែន​​ មាន​រយៈពេល​ជាង​៩​ខែ​ហើយ។ រដូវ​រងារ​សីតុណ្ហភាព​ចាប់​ធ្លាក់​ត្រជាក់​ខ្លាំង​ហើយ ប្រជាពលរដ្ឋ​អ៊ុយក្រែនជា​ច្រើន​លាន​នាក់​កំពុង​រស់ដោយ​​គ្មាន​អគ្គីសនី​ប្រើប្រាស់ទៀត ព្រោះ​​រចនា​សម្ព័ន្ធ​ថាមពល​ត្រូវ​រង​ការ​បំផ្លាញ​ពី​សំណាក់​គ្រាប់​ផ្លោង​រុស្ស៊ី។ ស្ថានភាព​​នេះ បាន​ជំរុញ​ឱ្យ​​អ៊ុយក្រែន​កាន់​តែក្តុកក្តួលក្រៃក្នុង​ថ្ងៃ​​រំលឹក​ខួប​សោកនាដកម្ម​រងគ្រោះ​ទុរ្ភិក្ស​បង្ក​ឡើង​ដោយ​របប​ផ្តាច់ការ​ស្តាលីន នៃអតីត​សហភាព​សូវៀត។​ បើ​តាម​ប្រវត្តិវិទូ គ្រោះមហា​ទុរ្ភិក្ស​ដ៏​ធ្ងន់ធ្ងរក្នុង​ប្រវត្តិសាស្ត្រ​ពី​ឆ្នាំ​ ១៩៣២-១៩៣៣ បាន​ផ្តាច់​ជីវិតប្រជាជន​អ៊ុយក្រែន​ ១៥%​​។ ជា​ប្រវត្តិ​ដ៏​ជូរ​ចត់​ ដែល​អ៊ុយក្រែន​ចាត់​ទុក​ និង​ចង់​ឱ្យ​សហគមន៍អន្តរជាតិ​ទទួល​ស្គាល់ជា​អំពើ​ប្រល័យ​ពូជសាសន៍​​ ប៉ុន្តែមូស្គូ​អះអាង​ថា រុស្ស៊ី​ក៏​​ជា​ជន​​រងគ្រោះ​ដែរ។ គ្រោះ​មហាទុរ្ភិក្ស​​នៅអ៊ុយក្រែន ក្នុង​អំឡុង​ឆ្នាំ​១៩៣២-៣៣ ជា​ប្រវត្តិសោកនាដកម្ម​ដ៏ឃោរឃៅ​​នៃ​របប​ផ្តាច់ការ​ស្តាលីន ឬ​របប​សហភាព​សូវៀត ដោយ​បាន​សម្លាប់​ជីវិត​មនុស្ស​អស់​ប្រមាណ​ពី​៣ទៅ​៦​លាន​នាក់​ នៅតាម​​រដ្ឋ​ជា​អតីត​សហភាព​​សង្គមនិយម​សូវៀត រាប់​តាំងពី​កាហ្សាក់ស្ថាន​ ដល់​អ៊ុយក្រែន ព្រមទាំង​រុស្ស៊ី​ផង។ នៅអ៊ុយក្រែន គេ​ហៅ​​គ្រោះ​មហា​ទុរ្ភិក្ស១៩៣២-៣៣ ថា “អូឡូដូម័រ Holodomor” ដែល​មាន​ន័យ​ចំ​​ថា ការ​សម្លាប់​រង្គាល ដោយ​បង្អត់អាហារ។ ជា​រៀង​រាល់​ឆ្នាំ អ៊ុយក្រែន​តែង​តែ​ធ្វើ​ពិធី​រំលឹក​ខួប​ឧទ្ទិសដល់​វិញ្ញាណក្ខន្ត​ជន​រងគ្រោះ ជា​រៀង​រាល់​ថ្ងៃ​សៅរ៍​ចុង​ខែ​វិច្ឆិកា។ ឆ្នាំ​នេះ​ គ្មាន​ទេ​ការ​ជួបជុំ​ប្រមូល​ផ្តុំ​គ្នា ព្រោះ​ខ្លាច​មាន​ការ​ទម្លាក់​គ្រាប់ពី​សំណាក់​យោធា​រុស្ស៊ី គឺ​មាន​តែ​ការ​អុជ​ទៀន តាម​ផ្ទះ​រៀងខ្លួនៗ ហើយ​ស្មឹងស្មាត​មួយ​នាទី នៅវេលា​ម៉ោង ៤រសៀល​នេះ។ បង្អត់​អាហារ​កុំឱ្យ​បះបោរ ចំពោះ​ប្រវត្តិ​ដំណើរ​ដើមទង​វិញ នៅ​ចុង​ឆ្នាំ ១៩២០ មេដឹកនាំ​ផ្តាច់ការ​ស្តាលីន បានលុបបំបាត់​សម្បត្តិឯកជន ហើយអឹមអូស​​​ប្រមូល​ដាក់​ជាសមូហភាព​ទាំង​អស់ រាប់​ទាំង​ដីស្រែ ទិន្នផល​កសិកម្ម ...។ ការ​ប្តូរផ្លាស់​សង្គម នយោបាយ សេដ្ឋកិច្ច បាន​ធ្វើ​ឱ្យ​ប្រជាជន​កាហ្សាក់ស្ថាន ១លាន​កន្លះ​ស្លាប់ (មួយភាគបួន​នៃ​ប្រទេស) មួយលាន​កន្លះ​នៅ​តំបន់​Volga ឬ​កូសកាស​ភាគខាងជើង​ប្រទេស​រុស្ស៊ី។ ការបះបោរ​ និង​ការ​ប៉ុនប៉ង​ពង្វាង​មិនយក​ផល​ទៅដាក់​ជា​​សមូហភាព​ បាន​លេច​ឡើង​គ្រប់​ទិសទី។ បើ​តាម​ប្រវត្តិ​វិទូ​បារាំង​ម្នាក់ នៅចុងឆ្នាំ​១៩៣២ មេដឹកនាំស្តាលីន សំឡឹង​ឃើញ​អ៊ុយក្រែន​មាន​ជំហរ​ប្រឆាំង​នឹងនយោបាយ​សូវៀត​ខ្លាំងជាងគេ ដោយមិន​ព្រម​បញ្ជូន​ទិន្នផល​កសិកម្ម​មក​ដាក់​រួមតាមផែនការ​ ក៏​ចាប់​ផ្តើម​រឹត​បន្តឹង​ ​គៀប​ ដាក់​អ៊ុយក្រែន​ឱ្យ​នៅឯកា និង​ធ្វើ​ឱ្យ​មាន​ការ​អត់​ឃ្លាន​កាន់​តែ​ខ្លាំង ដោយចេតនា​​នយោបាយ។ សូម្បី​តែ​អង្ករមួយគ្រាប់​ក្នុង​ផ្ទះ​ប្រជាជន​​ក៏​មិន​ឱ្យ​មាន​ដែរ។ ទង្វើ​​នេះ​ បាន​ធ្វើ​ប្រជាពលរដ្ឋអ៊ុយក្រែន​ស្លាប់​យ៉ាង​ត្រដ​និង​វេទនា​បំផុត អស់​ចំនួន ៣,៦លាន​នាក់​​ពី​ខែ​មករា​ដល់​ខែកក្កដា​១៩៣៣។ ការ​បក​ស្រាយ​ប្រវត្តិសាស្ត្រ អ៊ីចឹង​ហើយ​បាន​ជា​​​អ៊ុយក្រែន​ ចាត់ទុក​គ្រោះទុរ្ភិក្ស​ក្នុង​អំឡុងពេល​នោះ គឺ​ជា​អំពើ​ប្រល័យ​ពូជសាសន៍។ ​ថ្វីបើ​ទង្វើ​របស់​​ស្តាលីន ជា​​ចេតនា​បែប​ឧក្រិដ្ឋដោយ​ប្រកែក​មិន​បាន​មែន តែ​​សម័យ​នោះ គ្មាន​ទេរដ្ឋឬ​ប្រទេស​​រុស្ស៊ី។ យើង​អាច​និយាយ​បាន​ថា​រុស្ស៊ី​សម័យ​ថ្មី រុស្ស៊ី​ដឹកនាំ​ដោយ​លោក​ពូទីន​បច្ចុប្បន្ន​បន្ត​ប្រកាន់​ទ្រឹស្តី​និង​សកម្មភាព​បែប​ផ្តាច់ការ​ដូច​ស្តាលីន ប៉ុន្តែ​រុស្ស៊ី​មិនមែន​សូវៀត​ ហើយ​លោក​ពូទីន តែង​​ពន្យល់​ជា​រហូតមក​ថា​ រុស្ស៊ី​ក៏​ជា​ជន​រងគ្រោះ​នៃរបប​សហភាព​សូវៀត​ដែរ។ ហើយ​រុស្ស៊ី​តែង​តែ​ច្រាន​ចោល​ជា​និច្ច​នូវ​ពាក្យ “​ប្រល័យ​ពូជសាសន៍” នៅពេល​និយាយ​អំពី​គ្រោះ​មហាទុរ្ភិក្ស​ឆ្នាំ​១៩៣២-៣៣​នោះ ដោយ​លើក​ហេតុផល​ថា ជនរងគ្រោះ​ក្នុង​របប​សហភាព​សូវៀត មិនមែន​មាន​តែ​អ៊ុយក្រែន​ទេ តែ​ក៏​មាន​ដែរ​ពលរដ្ឋ​កាហ្សាក់ស្ថាន ពលរដ្ឋ​រុស្ស៊ី អាល្លឺម៉ង់ វ៉ុលហ្កា និង​ពលរដ្ឋ​ដទៃ​ទៀត​នៅភាគ​ខាង​ត្បូង​សហភាព​សូវៀត។ គ្រាន់​តែ អ៊ុយក្រែន​ រងគ្រោះ​ធ្ងន់ជាង​គេ ព្រោះ​ស្តាលីន​ខ្លាច​អ៊ុយក្រែន​ធ្វើ​បដិវត្ត​ ទើប​ប្រើ​វិធី​បង្អត់​អាហារ​ហើយ បំបិទ​សេរីភាព​មិន​ឱ្យ​ដើរ​ហើរ​ទៀត។ អាល្លឺម៉ង់​ត្រៀម​ទទួល​ស្គាល់​អំពើប្រល័យ​ពូជសាសន៍​ដោយ​ទុរ្ភិក្ស អូឡូដូម័រ​​ នៅអ៊ុយក្រែន​ អ៊ុយក្រែន​បាន​ធ្វើ​យុទ្ធនាការ​ឃោសនា​ ឱ្យ​សហគមន៍​អន្តរជាតិ​ទទួល​ស្គាល់​គ្រោះ​ទុរ្ភិក្ស​អូឡូដូម័រ ជា​អំពើ​ប្រល័យ​ពូជសាសន៍​ តាំងពី​ជា​ច្រើន​ឆ្នាំ​មក​ហើយ។ ជា​ផ្លូវការ​មាន​ប្រទេស​មួយ​ចំនួន​ហើយ ដូច​ជា​កាណាដា អាមេរិក និង​អាហ្សង់ទីន ព្រមទាំង​សហភាព​អឺរ៉ុបបាន​ទទួល​ស្គាល់​គ្រោះ​ទុរ្ភិក្ស​អូឡូដូម័រ ជា​អំពើ​ឧក្រិដ្ឋកម្មហើយ ហើយរដ្ឋាភិបាល​​​អាល្លឺម៉ង់​កំពុង​រៀប​ចំ​ គម្រោង​សេចក្តី​សម្រេច​ចិត្ត​ ចាត់​ទុក​ គ្រោះ​ទុរ្ភិក្ស​សម័យ​នោះ ថា​ជា​អំពី​ប្រល័យ​ពូជសាសន៍ដែរ។ រដ្ឋាភិបាល​អាល្លឺម៉ង់​បាន​​ដាក់គម្រោង​សេចក្តី​សម្រេច​ចិត្ត​​ជូន​ទៅ​សភា​កាលពី​ម្សិលមិញ ដែល​នឹង​ធ្វើការ​ពិចារណា​​នៅ​ថ្ងៃ​ពុធ​ខាង​មុខ។ ឧក្រិដ្ឋកម្ម​នេះ​ជា​ចំណែក​មួយ​នៃប្រវត្តិសាស្ត្រ​រួម​របស់​អឺរ៉ុប។ អ៊ុយក្រែន​ទាំងមូល​បាន​រងគ្រោះ​ទុរ្ភិក្សនិង​ការ​បង្ក្រាប មិនត្រឹម​តែ​នៅ​តំបន់​កសិកម្មទេ។ នេះ​បើ​តាម​ខ្លឹមសារ​នៃ​គម្រោង​សេចក្តី​សម្រេច​ចិត្ត​អាល្លឺម៉ង់ ដែល​បន្ថែម​ថា គ្រោះទុរ្ភិក្ស​នៅ​អ៊ុយក្រែន​ឆ្នាំ​១៩៣២-៣៣ ជា​ឧក្រិដ្ឋកម្ម​បែប​អមនុស្សនៃ ប្រព័ន្ធ​ដឹកនាំ​បែប​ផ្តាច់ការដែលបាន​លុប​បំបាត់​ជីវិត​មនុស្ស​​រាប់​លាន​នាក់​នៅអឺរ៉ុប។ រដ្ឋាភិបាល​អាល្លឺម៉ង់​យល់​ថា ក្នុង​ទស្សនៈ​វិស័យ​បច្ចុប្បន្ន (​សង្គ្រាម​ឈ្លានពាន​រុស្ស៊ី​លើ​អ៊ុយក្រែន) វា​ជា​កត្តា​សត្យានុម័ត​ដែលត្រូវ​ចាត់​ទុក តាម​ផ្លូវ​នយោបាយ​និង​ប្រវត្តិសាស្ត្រ​ ​​ថា​គ្រោះHolodomor ជា​អំពី​ប្រល័យ​ពូជសាសន៍​នោះ៕
    11/26/2022
    6:58

Radios similares

Acerca de ព្រឹត្តិការណ៍អន្តរជាតិប្រចាំថ្ងៃ

Sitio web de la emisora

Escucha ព្រឹត្តិការណ៍អន្តរជាតិប្រចាំថ្ងៃ, ភ្ញៀវប្រចាំថ្ងៃ y muchas más emisoras de todo el mundo con la aplicación de radio.es

ព្រឹត្តិការណ៍អន្តរជាតិប្រចាំថ្ងៃ

ព្រឹត្តិការណ៍អន្តរជាតិប្រចាំថ្ងៃ

Descarga la aplicación gratis y escucha radio y podcast como nunca antes.

Tienda de Google PlayApp Store

ព្រឹត្តិការណ៍អន្តរជាតិប្រចាំថ្ងៃ: Podcasts del grupo

ព្រឹត្តិការណ៍អន្តរជាតិប្រចាំថ្ងៃ: Radios del grupo